ASNN – Bëhet fjalë vetëm për dy ndeshje, dy ndeshje që mund të shërbejnë edhe si banko-provë edhe për ndeshjet e tjera që do të vijojnë, me shpresën e madhe se futbolli në vendin fillimisht më të prekur të Evropës, do të nisë të marrë sërish frymë. Kështu, taninë mediat në Itali po raportojnë se futbolli mund të rikthehet me 27 ose 28 maj, por, fillimisht me ndeshjet e Kupës së Italisë, ndërsa pak ditë më vonë mund të rinisë edhe Seria A.
Ndeshjet e para të gjysmëfinaleve të Kupës së Italisë janë luajtur tashmë dhe ato ishin duelet Milan 1-1 Juventus dhe Inter 0-1 Napoli. Natyrisht, janë të shumta dilemat për sa i përket sezonit aktual të Serisë A, të ndërprerë për shkak të epidemisë të koronavirusit. Në mediat italiane kanë qarkulluar e po kristalizohen edhe hipotezat e para, për sa i përket rifillimit të kampionatit. Sipas Federatës Italiane të Futbollit (FIGC), klubet mund të fillojnë me stërvitjet më 4 maj dhe me 30-31 maj të zhvillohen takimet e para.
“Serie A mund të mos rikthehet shpejt, por ajo mund të rifillojë të luhet në muajin maj me dyer të mbyllura”, – ka deklaruar drejtori i sëmundjeve infektive në Itali, Xhovani Reca. – Të gjithë janë duke i shikuar mundësitë dhe, ndonëse do të jetë një rrezik, prapëseprapë ai mund të administrohet me sukses, nëse bëjmë kujdes. Federata tashmë i ka shikuar të gjitha mundësitë që lojtarët, stafi dhe të gjithë aktorët e tjerët mos të rrezikohen.”
“Lojtarët thuhet se do të testohen pas çdo takimi, në mënyrë që të evitohen infektimet”, ka shtuar ai. Për më shumë se një muaj, e gjithë bota është paralizuar për shkak të epidemisë globale të koronavirusit. Natyrisht, është prekur edhe futbolli që vazhdon të mos luhet që nga gjysma e parë e marsit. Ka pasur zëra të shumtë majde edhe nëse duhet të rinisë sezoni në gjitha kampionatet e vendeve evropiane, pas virusit vdekjeprurës që ka marrë deri më tani mbi 130 mijë jetë në mbarë botën.
Sido që të jetë, Italia do të jetë e bllokuar deri me 4 maj, me shpresën që më pas dalëngadalë do të nisë të rikthehet jeta normale.
