Ka ndodhur fenomeni më i paparë në basketbollin shqiptar, ndonëse është përsëritës, sepse edhe me të rriturit apo të rriturat ka pasur raste të tillë, që një skuadër të vijë me gjyqtarë me vete. Është fjala për ndeshjen e të rinjve të basketbollit, që dje kanë mbyllur javën e 9-të të fazës së dytë të Kampionatit të tyre Kombëtar. Në takimin Virtus Tirana-Vllaznia kanë qenë dy gjyqtarë shkodranë.

Sigurisht që drejtuesit e Virtus Tiranës me në krye trajnerin Juxhin Talellin kanë protestuar, sepse sipas tyre nuk është normale që vijnë dy gjyqtarë nga Shkodra. Madje ka pasur dhe tendenca për bojkot, por që nuk ka ndodhur, sepse Virtus Tirana ka respektuar garën. Nuk ka bërë reklamim, por e ka quajtur jo normale që vijnë dy gjyqtarë të Shkodrës për të drejtuar Vllazninë në Tiranë.

Në fakt ka ndodhur të shtunën në Vlorë kur me Vllazninë e meshkujve njëri prej gjyqtarëve ka qenë Basho, apo dhe Flamurtarin e Vlorës për të rritura e kanë gjykuar vlonjatët Kasëmi dhe Hoxhaj. Sigurisht që janë fenomene që duhen shmangur, ndonëse rrethet jo pak ankohen kur ekipet të kryeqytetit vijnë me gjyqtarë nga Tirana. Një gjë e tillë dje është quajtur absurde nga Virtus Tirana, e cila në kohën shtesë ka fituar ndaj Vllaznisë, 58-53.

Lapsus, apo neglizhencë, një gjë e tillë mund dhe duhet të ishte shmangur nga Federata Shqiptare e Basketbollit. Në të njëjtën kohë duke mbetur tek ndeshjet e kësaj jave, Superiori ka fituar ndaj Tiranës dhe Teuta ndaj Real Basket. Të rinjtë kanë dhe një javë deri në përfundimin e kësaj faze për të përcaktuar më pas katërshen për titullin “kampion”.