“Gjylja e madhe plasi”. Asaj që Federata Shqiptare e Peshëngritjes i druhej prej kohësh dhe qëndronte me frikë, pavarësisht se lutej që të mos ishte kështu, e jo vetëm, ka ndodhur. Që do të thotë se Daniel Godelli, kampioni i Botës, por dhe Hysen Pulaku, kanë rezultuar në Botërorin e Peshëngritjes me doping, ndërsa sipas Federatës Botërore të Shtangës (IWF) kanë rezultuar me substancën e ndaluar stanozolol. Në Komunikatën e saj Federata Botërore të Peshëngritjes, si për Godellin, ashtu dhe Pulakun, ka shkruajtur: “Federata Botërore e Peshëngritjes shpjegon se kampioni A i Daniel Godellit dhe Hysen Pulakut ka rezultuar me substancën e ndaluar stanozolol”.
“Në këto kushte peshëngritësit janë të pezulluar përkohësisht për shkak të dhunimit të rregullave të anti-dopingut, – vijon më tej deklarata e shkurtër e IWF-së. – Në çdo rast, pas kryerjes së analizës B dhe apelimit të sportistit, nëse do të vërtetohet që sportisti nuk ka kryer dhunim të rregullave të antidopingut, atëherë Federata Botërore e Peshëngritjes do të publikojë vendimin e saj të ri. Deri sa çështja nuk është mbyllur nuk do të ketë asnjë koment tjetër”. Kjo ka qenë komunikata e Federatës Botërore të Peshëngritjes, e cila daljen pozitiv të Godellit dhe Pulakut në analizat B e ka publikuar në lajmet e reja të anti-dopingut.
Në fakt, komunikata ka ardhur prej ditësh në Federatën Shqiptare të Peshëngritjes, por është mbajtur e fshehur dhe kjo nuk është normale, ndërsa ishte Botërorja ajo që e publikoi, ashtu sikurse dhe në rastin e Begajt. Gjithnjë Federata Shqiptare e Peshëngritjes ndihet para të papriturës, ndonëse me katër raste brenda vitit, por në total 12 të tilla prej gati dhjetë vjetësh, do të thotë që peshëngritja është më shumë se sa e sëmurë. Një sport që mbetet gjithnjë jashtë kontrollit mjekësor, ndërsa kombëtarja, edhe pse ka qenë prej më shumë se dy muaj në Greqi, nuk ka pasur as doktor.
Një kombëtare, e cila ndryshe nga disiplinat e tjera, ka marrë dhe një fond shtesë nga qeveria për përgatitjen e Botërorit, atje ku priteshin jo vetëm medaljet, por dhe kualifikimet për në Lojërat Olimpike “Rio de Zhaneiro 2016”. Por tanimë… peshëngritja është damka më e madhe e sportit shqiptar, e cila do kohë që të shërohet. Ciladoqoftë arsyeja e këtyre tre rasteve me të njëjtën substancë, stanozolol, nuk justifikon asgjë. Sepse dhe një herë që patëm dy kampion të botës e gjetën mënyrën për të na njollosur. Njollë që ka dhe penalitete të mëdha, që nga gjoba e Federatës prej 100.000 euro, deri tek ndoshta pezullim për disa vite nga të gjitha veprimtaritë ndërkombëtare.
Që nëse ndodh e lë shtangën jashtë Lojërave Olimpike “Rio de Zhaneiro 2016”. Peshëngritësit do të mbrohen, ndërsa kanë pranuar që të bëjnë dhe analizën B, e cila do të bëhet më 25 dhjetor në Gjermani, por që duket e pamundur të ndryshojë të gjithë gjendjen, sepse në fund të fundit në epruveta është e njëjta urinë e marrë nga sportisti në Botërorin e Kazakistanit. Një turp i madh për të gjithë peshëngritjen dhe veçanërisht sportin shqiptar…