ASNN – Sot në mbrëmje u luajtën ndeshjet e para të kësaj faze në Ligën e Kombeve, por pati dhe mjaft duele miqësore, ku spikati në veçanti ndeshja midis Gjermanisë dhe Rusisë, fituar nga “pancerat” e trajnerit Joakim Lëv 3-0. Prej ditësh po flitet për Gjermaninë, për momentin e ripërtëritjes së saj dhe rezultatet e munguara në veprimtaritë zyrtare.
Që nga dështimi në Botëror, që ishte nga disfatat më të rënda për kombëtaren e këtij vendi në historinë e saj, e deri tek rezultatet e dobëta në Ligën e Kombeve, skuadra e Lëvit, lojtarët dhe stafi, kanë marrë kritika të forta. Sonte gjermanët mposhtën thellë dhe bindshëm Rusinë 3-0. Spikatën të rinjtë, ku shënuan Sane, Suele, Gnabri, që të tre lojtarë që nuk ishin në Botërorin e Rusisë.
Të tre golat u shënuan në pjesën e parë, ndërsa në të dytën nuk pati zhvillime në rezultat për pasojë me shifrat 3-0 fituan gjermanët, që largojnë për momentin kritikat. Me përjashtim të portierit Manuel Nojer, si dhe mbrojtësit Kimih, të gjithë lojtarët e tjerë janë emra të panjohur, disa të rinj të mbledhur nga Lëvi në kampionatin gjerman dhe jashtë tij, por që po tregojnë se e kanë futur Gjermaninë dhe një herë në “shinat” e suksesit.
Në vetëm dy ndeshje, këta të rinj kanë treguar një klas të madh dhe me siguri që Lëvi i ka ideuar ata për fazën kualifikuese dhe Evropianin e ardhshëm të vitit 2020. Ndërkohë, sot në mbrëmje Anglia tregoi potencë të madhe në miqësoren me Shtetet e Bashkuara të Amerikës, duke fituar 3-0, me golat e realizuar nga Lingardit dhe Arnoldit në pjesën e parë, si dhe Uillsonit në pjesën e dytë. Natyrisht, diferencat midis dy skuadrave ishin të ndjeshme.
