Duke parë që tashmë kualifikimi është në “xhep”, trajneri Erind Resuli kishte menduar t’i jepte më tepër shanse lojtarëve që kanë luajtur më pak. Dhe këtë e ka nisur me portierin Rrapi, i cili është ndër më të vjetrit e kësaj përfaqësueseje, sepse e ka nisur futbollin e sallës, jo pak, por para 13 vjetësh.
E pastaj e gjithë pjesa tjetër është e lojtarëve që kanë përballuar të gjitha këto ndeshje eliminatore. Kuqezinjtë e kanë nisur mirë dhe shpejt ndeshje, ashtu sikurse kanë bërë dhe përballë Bullgarisë e Anglisë. Ka shënuar Alibegu, por maltezët kanë barazuar shpejt me Azopardin. Dhe, pas golit të Frendos, janë ishullorët që kanë përmbysur dhe e kanë mbyllur pjesën e parë në epërsi 2-1.
I janë dashur shumë punë dhe mund kuqezinve për të barazuar, gol i cili ka ardhur nga Brahimi në minutën e 24-t. Dhe, vetëm në fund, me anë të Selmanajt kanë siguruar fitoren e 3-të në po aq ndeshje të kësaj faze paraeliminatore. Sepse për hir të së vërtetës duhet pranuar që Malta është marrë shumë më lehtë se të tjera.
Por në fund fitore 3-2 dhe tashmë mendja në prill në Azerbajxhan; e para kualifikohet direkt për në finalen e Evropianit, e dyta dhe e treta shkon në “play-off”, çka nënkupton shanse realisht më të mëdha për Shqipërinë e futbollit të sallës që të ëndërrojë për gjithçka.

Kampionati Evropian
i Futbollit të Sallës

Turi paraeliminator

Grupi D

Të martën, 24 janar 2017:
Angli – Maltë 5-1
Bullgari – Shqipëri 1-7

Të mërkurën, 25 janar 2017:
Shqipëri – Angli 5-1
Bullgari – Maltë 6-1

Të premten, 27 janar 2017:
Maltë – Shqipëri 2-3
Bullgari – Angli 1-4

Renditja
Nr. Skuadra N. F. B. H. Gsh-Gp Pikë
1. Shqipëria 3 3 0 0 15-4 9
2. Anglia 3 2 0 1 10-7 6
3. Bullgaria 3 1 0 2 8-12 3
4. Malta 3 0 0 3 4-14 0