ASNN – Janë luajtur këtë të shtunë ndeshjet e parë të Ligës së Kampioneve të Evropës në futbollin e sallës, të vlefshme për grupin C të fazës eliminatore. Në ora 17:00 është zhvilluar sfida e parë mes hungarezëve të Haladashit dhe norvegjezëve të Utleiras. Sfida e luajtur në Sallën Sportive të Lojërave me Dorë “Feti Borova” të Parkut Olimpik të Tiranës, ka qenë mjaft e bukur dhe ka dhuruar gola e emocione. Pas një pjese të parë të ekuilibruar, në pjesën e dytë hungarezët e Haladashit kanë treguar superioritetin e tyre, duke triumfuar me rezultatin 5-1.
Në sfidën e dytë të ditës të luajtur po në “Feti Borova”, janë vënë përballë luksemburgasit e Diferdonzhit 03 me Tiranën. Edhe kjo një ndeshje mjaft e bukur dhe me nivel të lartë. Pas një pjese të parë shumë të mirë, që u mbyll me shifrat 0-0, në pjesën e dytë Tirana arriti të gjente golin e parë me anë të Qerimit në minutën e 25-të. Një gol që karikon bardheblutë, të cilët pas 4 minutash gjejnë edhe golin e dytë me anë të një kundërsulmi, që finalizohet po nga Qerimi. Por Diferdonzhi nuk dorëzohet dhe reagon shumë shpejt, duke ngushtuar shifrat me golin e Torresit.
Sidoqoftë, bardheblutë arrijnë të mbajnë kontroll ndeshjen dhe e administrojnë mirë atë, duke gjetur golin e 3-1 kur kishin mbetur edhe dy minuta nga përfundimi i sfidës me anë të Halimit. Edhe pse Diferdonzhi reagon shumë shpejt dhe ngushton rezultatin në 3-2 me golin e Bocumit, pa kaluar as një minutë, Tirana shënon sërish me Kelmendin, pas një aksioni këmbëngulës duke fiksuar rezultatin në 4-2. Kësisoj, ekipi shqiptar triumfon dhe e nis me këmbën e mbarë këtë veprimtari evropiane. Të dielën e 22 gushtit luhen takimet e dyta në këtë grup.
Ndeshja e orës 17:00 është ajo midis luksemburgasve të Diferdonzhit 03 dhe hungarezëve të Haladashit, ndërsa në ora 20:30 luhet dueli midis Tiranës dhe norvegjezëve të Utleiras. Dy sfidat e fundit të Grupit C luhen më 24 gusht 2021 dhe e para është ajo që nis në ora 17:00, midis Utleiras dhe Diferdonzhit 03, kurse në ora 20:30 nis përballja midis Tiranës dhe Haladashit. Nëse Tirana arrin të kalojë turin do të njihet me rivalët në fazën tjetër të kësaj veprimtarie në shortin që hidhet nga selinë e UEFA-s, në Nion, më 30 gusht 2021.
