ASNN – Kuqezinjtë e futbollit të sallës munden 1-3 nga Danimarka, takimi drejtpërdrejt në RTSH Sport. Kombëtarja e Futbollit të Sallës ka luajtur të mërkurën takimin e 3-të në kuadër të Eliminatoreve të Evropianit 2022, duke pësuar edhe humbjen e 3-të, këtë radhë përballë Danimarkës.
Në fakt, shpresat për një fitore në përballjen e sjellë për sportdashësit drejtpërdrejt nga Rrjeti i Radio-Televizionit Shqiptar në kanalin RTSH Sport, kanë qenë të mëdha, por janë miqtë që marrin kryesimin të parët. Siqodoqoftë, kuqezinjtë do të gjejnë golin e barazimit në fundin e pjesës së parë, edhe falë një devijimi të futbollistëve danezë.
Pjesa e dytë do të jetë e hapur, por miqtë do të kalojnë sërish në epërsi me anë të Vajsit. Shqipëria e trajnerit Erind Resuli do të rrezikojë gjithçka për gjithçka, duke i patur mundësitë për të barazuar shifrat, por duke vijuar të ndëshkohet në minutën e parafundit, kur danezët shënojnë edhe golin e 3-të.
Mbyllet kështu me fitoren e Danimarkës kjo përballje e parë, ndërsa edhe takimi i dytë, që do luhet të enjten pasdreke në kryeqytetin shqiptar, do të vijë për sportdashësit drejtpërdrejt në RTSH Sport, duke nisur nga ora 13:00.
