Me rregullore kalon në turin tjetër vetëm kryesuesja, kurse kuqezinjtë e Resulit, me një paraqitje shumë të mirë, do të ngushëllohen vetëm me vendin e dytë. Të dielën për statistikë ndaj Maltës. Një gol i Francës që në fillimin e ndeshjes me anë të Muhamed i ka mohuar kualifikimin për në turin tjetër të eliminatoreve të Kampionatit Botëror kombëtares kuqezi të sallës.

Kanë bërë një ndeshje të mirë. Kanë qenë vazhdimisht në kërkim të golit me Halimin, Karaja, Begajn, por në pjesën e parë kanë shkuar në dhomën e zhveshjes me disavantazhin 0-1. Kanë marrë zemër nga pritjet e Rrapit dhe kanë besuar se një gjë të tillë do të mund të realizojnë në pjesën e dytë, atje ku dhe barazimi i mbante në vendin e parë për arsye golaverazhi.

Nuk janë dekurajuar edhe kur kanë mbetur me një lojtar më pak pas daljes së Gockajt, që është ekuilibruar me kartonin e kuq të Ramirezit. Dhe në fund, kur Franca ka qenë me katër lojtar për dy minuta, furia e tanëve është e papërmbajtshme. Begaj kërkon gjithçka. Godet shtyllën, i afrohet golit, por Harun i thotë jo, ndërsa Franca shpëton nga pësimi i golit kur Brahimin e ndal shtylla.

Mëkat, që kështu për një gjysmë goli tanët janë djegur nga kalimi i turit. Sepse tashmë ndeshja e fundit me Maltën, të dielën në ora 11:00, vlen vetëm për statistikë, ndërsa Francës i mjafton barazimi me Lituaninë për të “salduar” vendin e parë. Megjithatë e gjithë kjo paraqitje e tanëve është më shumë se sa dinjitoze.

Shqipëri – Francë                0-1

Shënues: Muhamed 2’

Shqipëria: Rrapi, Mejzini, Halimi, Selmanaj, Brahimi / Gashi, Begaj, Hasaj, Bllumbi, Gockaj, Agolli, Karaja, Hoxha, Kaca. Trajner: E. Resuli

Franca: Harun, Aigun, Hamdud, A. Muhamed, Gasmi / J. Muhamed, Kerumi, Ramirez, Belhazh, Galuz, Bensaber, Guebli, Alla, Rabei. Trajner: P. Zhaki

Gjyqtarë: O. Niemela (Finlandë), D. Nikoliç (Slloveni)

Karton i verdhë: Rabei

Kartonë të kuq: Gockaj / Ramirez