Flamurtari, kampionia në fuqi e futbollit të sallës, e ka mbyllur me barazimin paraqitjen e saj në Kupën “UEFA”. Pas fitores me gjermanët e Shtutgartit, 4-3, por dhe pas humbjes troditëse me qipriotët e APOEL Nikozisë, 1-9, ndeshja me kampionët e Estonisë ka qenë më shumë se e vështirë. Lojtarët e Anzhi Talinit e kanë vënë nën presion që në minutat e para skuadrën tonë kampione.

Porta vlonjate “bombardohet” nga gjuajtjen e Kostin, Tsurilkin, Kulisov, Kolosov, Pronin, por Rrapi është treguar i saktë në pritjet. E atëherë kur nuk pritej ka ardhur vetëndëshkimi për vlonjatët, teksa Aloviç ka shënuar në portën e tij. Estonezët nuk e ulin presionin dhe Kulikov ka shënuar dhe golin e dytë. Pjesa e dytë është tjetër pamje për Flamurtarin. Koçoviç dhe Aloviç kanë përmbysur në 2-2.

Por Skiperski e mban përsëri skuadrën në avantazh 3-2. Flamurtari nuk dorëzohet dhe Karlos Kalus ka shënuar dhe golin e tretë. Vlonjatët i kanë pasur të gjitha shanset për ta fituar ndeshjen, por Aloviç ka gabuar nga pika e bardhë e 11-metërshit. Ka tre kartonë të verdhë për vlonjatët, dy prej të cilët për protesta ndaj gjyqtarët. Megjithatë me 4 pikë në vendin e 3-të, me 8 gola të shënuar dhe 15 të pësuar, kjo e sivjetmja duhet konsideruar një paraqitje dinjitoze në Evropë për Flamurtarin e futbollit të sallës, që vitin e ardhshëm shpreson të jetë përsëri “kampione” e Shqipërisë.

Flamurtari – Anzhi Talin 3-3

Shënues: Koçoviç 27’, Aloviç 28’, K. Kalus 30’ /

Aloviç 8’(a.g.), Kulikov 18’, Skiperski 28’

Flamurtari: Rrapi, K. Kalus, S. Qopekaj, Koçiraj, A. Qopekaj / Koçoviç, Aloviç, Gurzakoviç. Trajner: M. Kalus

Anzhi Talin: Boskin, Kostin, Merkurjev, Tsurilkin, Skiperski / Kulikov, Kolosov, Pronin, Kirilov, Kusnir. Trajner: D. Klimov

Gjyqtarë: V. Bugenko (Moldavi), B. Zogaj (Zvicër)

Kartonë të verdhë: Koçiraj, Aloviç, Gurzakoviç / Merkurjev, Kusnir