ASNN – Kombëtarja shqiptare e futbollit të sallës vijon përgatitjet prej disa ditësh për dy ndeshjet e radhës të Eliminatoreve të Kampionatit Evropian të 2022-shit ndaj Danimarkës. Kuqezinjtë janë grumbulluar që prej ditës së dielë dhe po stërviten rregullisht nën drejtimin e trajnerit Erind Resuli në Sallën e Lojërave me Dorë “Feti Borova” të Parkut Olimpik të Tiranës, ku edhe do të zhvillohen dy sfidat zyrtare ndaj danezëve.
Duke folur për faqen zyrtare në Internet të Federatës Shqiptare të Futbollit (FSHF), Azem Brahimi, një nga pikat kyçe të përfaqësueses shqiptare të futsallit, është optimist dhe shpreson që ndaj Danimarkës të merret maksimumi i pikëve. Brahimi shprehet se atmosfera është shumë e mirë në grup dhe se të gjithë janë të motivuar për t’i marrë maksimumin këtyre sfidave. “Për fat të mirë dy ndeshjet me Danimarkën i zhvillojmë në shtëpi”, – thotë ai fillimisht.
“Shpresojmë dhe jemi shumë të motivuar që të marrim 6 pikë të plota, – ka vijuar futbollisti kuqezi. – Atmosfera është shumë e mirë, skuadra është në formë dhe të gjithë presim rezultate pozitive.” Ndërkohë, Brahimi nuk shfaq asnjë shenjë nënvlerësimi ndaj Danimarkës, por thekson se Shqipëria ka cilësitë e duhura për t’ia dalë mbanë.“Kundër Kroacisë dhe Ukrainës kemi pasur shumë mungesa, nuk kishim 5 lojtarë, por tani jemi më të qetë, pasi jemi të kompletuar dhe po punojmë mirë”, – thotë ai.
“Danimarka nuk është aspak kundërshtar i dobët, ka nivel shumë të mirë, por mendoj që kombëtarja jonë ka më shumë kualitetet dhe mund t’i mposhtim. A do të shënoj sërish? Të shpresojmë shumë që të ndodhë kështu”, – përfundoi Azem Brahimi. Ndeshja e parë në kuadër të Eliminatoreve të “Euro 2022” të futbollit të sallës midis Shqipërisë dhe Danimarkës do të luhet të mërkurën më datën 3 mars 2021, duke nisur nga ora 19:00 në Parkun Olimpik të Tiranës.
Edhe ndeshja e kthimit do të luhet në Tiranë, më 4 mars 2021, duke nisur nga ora 13:00, në Sallën e Lojërave me Dorë “Feti Borova” të Parkut Olimpik të Tiranës. Vendimi për ta luajtur ndeshjen e kthimit në kryeqytetin shqiptar është marrë pas konsultave të vazhdueshme mes FSHF-së, Federatës Daneze të Futbollit dhe UEFA-s për shkak të masave kufizuese të përcaktuara nga autoritetet shtetërore daneze për parandalimin e përhapjes së “Covid-19”, si edhe karantinës së detyruar për të gjithë personat që hyjnë në Danimarkë.
