ASNN – Pas mbylljes së fazës së parë të Kampionatit Kombëtar të Futbollit të Femrave në muajin dhjetor, më 14 janar 2024 rikthehet Kupa e Shqipërisë për këtë kategori. Ashtu sikurse edhe vitin e kaluar, sipas skemës së re, në këtë veprimtari do të marrin pjesë 8 ekipe, ndërsa dy skuadrat e renditura në vendin e parafundit dhe të fundit, respektivisht Skënderbeu e Teuta nuk do të marrin pjesë.
Kjo skemë është përllogaritur në bazë të renditjes së skuadrave pas përfundimit të fazës së parë, teksa ky edicion i 15-të i Kupës së Shqipërisë në Futbollin e Femrave do të ngrejë siparin më 14 janar. Ndërkaq, 8 skuadrat që do të marrin pjesë në këtë veprimtari janë Vllaznia, Tirana, Apolonia, Partizani, Gramshi, Laçi, Lushnja dhe Kinostudio.
Sipas skemës së përcaktuar nga Departamenti i Garave në Federatën Shqiptare të Futbollit (FSHF), 8 ekipet do të ndeshen me njëra-tjetrën sipas kësaj formule: 8-1; 7-2; 6-3; 5-4, ku numrat përkojnë me renditjen aktuale të ekipeve të vajzave pas fazës së parë. Ndeshjet do të luhen me sistem vajtje-ardhje, me takimet e para që do të luhen më 14 janar dhe përballjet e dyta më 21 janar.
Ndërkaq, më pas ndeshjet e turit gjysmëfinal do të luhen në datat 28 janar dhe 4 shkurt, ndërsa Departamenti i Garave në FSHF do të përcaktojë në ditët në vijim edhe datën se kur do të luhet finalja e madhe. Kujtojmë që Vllaznia është shpallur 10 herë me radhë fituese e kësaj veprimtarie kaq të rëndësishme në futbollin e vajzave.
Kupa e Shqipërisë 2024-205
Futboll – Femra
Shorti i çerekfinaleve:
Tirana – Lushnja (14 janar 2024- ora 11:00)
Lushnja – Tirana (21 janar 2024)
Vllaznia – Gramshi (14 janar 2024 – ora 12:00)
Gramshi – Vllaznia (21 janar 2024)
Apolonia – Laçi (14 janar 2024 – ora 13:00)
Laçi – Apolonia (21 janar 2024)
Partizani – Kinostudio (14 janar 2024 – ora 13:00)
Kinostudio – Partizani (21 janar 2024)
Kampionati Kombëtar
Futboll – Femra
Renditja
Nr. Skuadra Pikë
- Tirana 25
- Vllaznia 25
- Apolonia 21
- Partizani 18
- Kinostudio 15
- Laçi 10
- Gramshi 10
- Lushnja 3
- Skënderbeu 3
- Teuta 3
