ASNN – Kampionati Kombëtar i Futbollit për Femra do të rikthehet këtë fundjavë në fushën e blertë, me ndeshjet e javës së 13-të të tij, që do të luhet e ndarë në dy ditë, të shtunën dhe të hënën. Java do të hapet me sfidën Tirana AS-Akademia AAS. Kryeqytetaset vijnë pas fitores së derbit në ndeshjen e zhvilluar në Tiranë kundër të kuqeve të Partizanit dhe do të tentojnë fitoren e dytë radhazi me fillimin e kësaj fazë të dytë.

Ndërkohë, shkodranet e Akademisë AAS, pas fitores minimale në Bilisht, luajnë për të fituar tre pikët në një sfidë mjaft delikate. Ndeshja do të zhvillohet në kryeqytet, duke nisur nga ora në ora 11:30. Po të shtunën, Partizani do të udhëtojë drejt Shkodrës, ku do të përballen me Juban Danjën e vendit të 5-të, në një sfidë ku të dyja ekipet do të luajnë për fitore dhe që luhet duke nisur nga ora 13:00. Kryesfida e javës do të luhet në kryeqytet.

Në përballjen klasike të topkëmbës shqiptare, këtë radhë të vajzave, ku Tirana do të presë shkodranet e Vllaznisë. Tirana do të tentojë t’i rrëmbejë 3 pikët kampioneve, të cilat deri më tani nuk kanë lëshuar asnjë pikë, duke i fituar të gjitha ndeshjet e kampionatit. Tre sfidat e tjera të javës do të luhen ditën e hënë. Lushnja do të presë në shtëpi bregdetaret e Teutës, në një ndeshje që parashikohet shumë e luftuar nga të dyja skuadrat.

Ekipet vijnë pas disfatave në javën e 12-të të kampionatit, ku Lushnja u mund me rezultatin e thellë 0-8 në Shkodër ndërsa bregdetarët u mundën në shtëpi nga ekipi tjetër shkodran i Juban Danjës. Ndeshja do të nisë në ora 11:00 në stadiumin “Roza Haxhiu”. Skuadra tjetër myzeqare, Apolonia, do të sfidojë në stadiumin “Loni Papuçiu” Bilisht Sportin, një ndeshje e lehtë në letër për fieraket e vendit të dytë, që janë 5 pikë larg vendit të parë.

Sfida mes këtyre dy skuadrave do të nisë në ora 13:00. Java e 13-të do të mbyllet me ndeshjen Skënderbeu-Kinostudio, një sfidë interesante që do të luhet në Korçë, duke nisur nga ora 14:00.

Kampionati Kombëtar

i Futbollit – Femra

Java e 13-të:

Të shtunën, 20 mars 2021:

Tirana AS – Akademia AAS            ora 11:30

Juban Danja – Partizani                  ora 13:00

Tirana – Vllaznia                               ora 13:00

Të hënën, 22 mars 2021:

Lushnja – Teuta                                ora 11:00

Apolonia – Bilisht Sport                   ora 13:00

Skënderbeu – Kinostudio               ora 11:00