ASNN – Projekti “Step by Step”, trajnerët e ekipeve kombëtare zbresin në fushë me lojtarët e grupmoshës së Nën-15-vjeçarëve dhe Nën-17-vjeçarëve. Projekti “Step by Step” ka nisur nga puna edhe këtë vit, teksa në “Shtëpinë e Futbollit”, siç njihet ndryshe selia e Federatës Shqiptare të Futbollit (FSHF) në kryeqytet, për dy ditë me radhë janë stërvitur lojtarë të grupmoshës së Nën-15-vjeçarëve dhe Nën-17-vjeçarëve, të cilët aktivizohen me klubet e kampionatit shqiptar.

I gjithë procesi është monitoruar nga Drejtoria Teknike e FSHF-së dhe nga specialistët e Departamentit të Ekipeve Kombëtare, teksa seancat stërvitore janë drejtuar nga trajneri i Kombëtares së Nën-15-vjeçarëve, Armand Damo, dhe trajneri i Kombëtares Nën-17-vjeçarëve, Ardi Behari. Lojtarët e grumbulluar kanë punuar në aspektin fizik e teknik, por mbi të gjitha në aspektin taktik individual pasi synimi kryesor është për t’i rritur ato në të gjithë elementët fiziko-tekniko-taktik, por edhe në aspekt ekipor.

Me futbollistët e grumbulluar do të punohet çdo javë. Në muajin janar lojtarët e grup-moshës së Nën-15-vjeçarëve dhe Nën-17-vjeçarëve do të grumbullohen sërish më datë 23 janar 2024. Ndërsa më datë 29 janar në kuadër të projektit “Step by Step”  do të grumbullohen edhe lojtarët e grupmoshës Nën-19-vjeçarëve që do të vihen nën urdhrat e trajnerit të Kombëtares së kësaj grupmoshe, Ervin Bulku.

Projekti “Step by Step” ka si qëllim të angazhojë të gjithë futbollistët e grupmoshave të Nën-15-vjeçarëve, Nën-17-vjeçarëve dhe Nën-19-vjeçarëve të cilët jetojnë në Shqipëri, pasi synohet që të rritet sa më shumë cilësia e lojtarëve vendas, të cilët janë pjesë e klubeve dhe akademive shqiptare, në mënyrë që ato të bëhen baza e ekipeve kombëtare të moshave.