ASNN – Federata Shqiptare e Futbollit (FSHF) ka bërë të ditur nëpërmjet një njoftimi në faqen e saj zyrtare në Internet se së shpejti do të nisë implementimin e Sistemit të Ndihmësgjyqtarit të Videos (VAR) edhe për disa nga ndeshjet e Kategorisë së Parë.
Përfshirja e sistemit VAR edhe në ndeshjet e nivelit të dytë të Kampionatit Kombëtar të Futbollit ka qenë një objektiv i hershëm i FSHF-së ndërkohë që ky sistem përdoret në Kategorinë Superiore, që prej sezonit 2021-2022.
Ky sistem tashmë përdoret rregullisht prej 3 sezonesh në nivelin më të lartë të Kampionatit Kombëtar të Futbollit, ashtu si edhe në Kupën e Shqipërisë, duke filluar që nga faza çerekfinale e deri në finalen e madhe.
FSHF është duke bërë përgatitjet e fundit që përfshirja e sistemit VAR të nisë menjëherë në pjesën e dytë të sezonit për disa ndeshje të Kategorinë e Parë, ndërsa mbeten për t’u përcaktuar se cilat do të jenë këto ndeshje.
