ASNN – Nëpërmjet një postimi në faqen e saj zyrtare në Internet, Federata Shqiptare e Futbollit (FSHF), ka njoftuar të gjithë tifozët dhe të interesuarit se ka filluar sot shitja e biletave për ndeshjen Shqipëri-France, e cila do të zhvillohet në Stadiumin “Elbasan Arena”, në datën 13 qershor 2015, duke nisur nga ora 18:00. Pikat e shitjes së biletave për këtë ndeshje do të jenë pranë biletarisë së Stadiumit Kombëtar “Qemal Stafa” në Tirane dhe në Internet, në faqen zyrtare të FSHF-së (www.fshf.org)
Çmimet e biletave për këtë ndeshje janë si vijon: Tribunat C2 dhe G2, 1,000 lekë, Tribunat C1, C3 dhe G1, 1,500 lekë, Tribunat D dhe F, 2,000 lekë, Tribuna E, 3,000 lekë, Tribunat B1 dhe B5, 6,000 lekë , Tribunat B2, B4, A1 dhe A4, 8,000 lekë dhe Tribunat A2, A3 dhe B3, 10,000 lekë. FSHF-ja ka bërë të ditur se stadiumi “Elbasan Arena” është i pajisur me sistemin elektronik të kontrollit të biletave.
Po kështu, sipas organizmit që qeveris futbollin shqiptar, biletat e prodhuara për këtë ndeshje kane elemente sigurie të nivelit më të lartë, të dukshëm dhe të padukshëm me sy të lirë. Sistemet e kontrollit të biletave në hyrjet e stadiumit janë të kompjuterizuara. Këto janë masa që FSHF-ja merr në mbrojtje të tifozëve dhe për të ndaluar çdo abuzues të mundshëm.
Sipas saj, e vetmja mënyre për t’u siguruar nëse biletat janë të rregullta, është kontrolli me pajisjet e përshkruara më lart, prandaj këshillohen të gjithë të interesuarit të blejnë bileta vetëm në pikat zyrtare të shitjes të ofruara nga FSHF, të cilat janë pranë biletarisë në Stadiumin Kombëtar “Qemal Stafa” në Tiranë, pranë biletarisë së Stadiumit “Elbasan Arena” dhe në Internet, faqen zyrtare të FSHF-së.
Ndërkohë, Federata Shqiptare Futbollit ka njoftuar se ka filluar zyrtarisht aplikimi “online” për akreditimin e gazetarëve, operatorëve dhe fotoreporterëve që do të përzgjidhen për të qenë të pranishëm në ndeshjen miqësore Shqipëri-Francë. Pas aplikimit, i cili do të jete i disponueshëm rreth 15 ditë, të përzgjedhurit do të njoftohen me e-mail nga zyra e shtypit pranë FSHF-së.
