ASNN – “Nesër në orën 10:30 kemi takim me Ministrinë e Shëndetësisë.” Kështu ka deklaruar të premten Sekretari i Përgjithshëm i Federatës Shqiptare të Futbollit (FSHF), Ilir Shulku, duke folur në lidhje me rifillimin e kampionatit, takimin me ministrinë dhe për testet që janë të nevojshme për futbollistët dhe stafet e klubeve. “Do të flasim mbi rifillimin e kampionatit, – ka thënë ai. – Nuk mund të them gjëra konkrete. Kemi kërkuar të bisedojmë dhe nesër do ulemi që të flasim.”
“Nëse biem dakord nesër, që pasnesër nis stërvitja, – ka vijuar nr. 2 i organizmit që qeveris futbollin në vend. – Kuptohet sipas protokollit. Kampionati varet se kur nis stërvitja. Dy janë do të ishin mjaftueshëm. Duam të luajmë të gjithë kampionatet, të Parën, të Dytën, femrat dhe moshat.” Ish-futbollisti i Kombëtares, tanimë drejtues në FSHF, ka folur edhe për çështjen e testeve. “Do ta diskutojmë nesër dhe do të shohim si do të shkojmë më tej”, – ka thënë ai.
“Nuk kemi të njëjtin nivel me vendet e tjera, – ka vijuar Shulku. – Nga dita në ditë janë lehtësuar masat. Shpresojmë të zgjidhet edhe ky problem gjatë bisedimeve. Do jetë pikë diskutimi në lidhje me tamponët, se kush e merr përsipër, kontribuojmë të dy palët, qeveria, apo Ministria. Nuk kemi bërë ndonjë bisedë, që të kemi ndonjë ide”. Duke folur për mediat sportive shqiptare, zyrtari i FSHF-së ka prekur edhe çështjen e stërvitjeve dhe të kalendarit
“E thashë që minimalisht dy javë. Nëse Ministria vendos që pasnesër të nisë stërvitja, atëherë do lëmë kohë më shumë. Jemi me datë 8 dhe nëse të hënën nisim, atëherë kemi kohë të lëmë më shumë se dy javë. Janë dy javë kampionat dhe pesë Kupë. Do luhej kupa në mesjave dhe nuk do kishte ngjeshje”, – ka përfunduar Sekretari i Përgjithshëm i Federatës Shqiptare të Futbollit (FSHF), Ilir Shulku.
