ASNN – Ka nisur të hënën në Federatën Shqiptare të Futbollit (FSHF) kursi i rinovimit të licencave për trajnerët shqiptarë. Nga data 16 gusht e deri më 25 gusht 2021, Drejtoria Teknike pranë FSHF organizon rinovimin e licencave të trajnerëve të nivelit UEFA B, UEFA A dhe UEFA PRO.
Të parët që i janë nënshtruar këtij procesi që nga dita e hënë janë trajnerët që zotërojnë licencën UEFA B e që për 3 ditë me radhë do t’i nënshtrohen testimeve për përditësimin e licencës. Të gjithë trajnerët që zotërojnë këto licenca që prej vitit 2018, duhet të marrin pjesë në këto kurse për të rinovuar kartonin.
Rinovimi i licencave sipas niveleve është një detyrim i përcaktuar nga Konventa e Trajnerit të UEFA-s. Mosrinovimi i heq të drejtën trajnerit për të trajnuar, pasi licenca kthehet në joaktive. Rinovimi i këtyre licencave që do të bëhet pranë selisë së FSHF-së, do të shoqërohet me një taksë regjistrimi, që përfshin përditësimin dhe rinovimin e saj.
Nga data 19 e deri më 21 gusht do të zhvillohet kursi për rinovimin e licencës UEFA A, ndërsa në datat 23-25 gusht është radha e rinovimit të licencave UEFA PRO. Trajnerët që dëshirojnë më shumë informacione rreth këtij procesi mund të dërgojnë një e-mail në adresën drejtoria.teknike@fshf.al
