ASNN – Një faqe e re speciale, kushtuar gjithë fazës finale të Evropianit “Francë 2016” ka qenë risia e re që ka bërë publike, Federata Shqiptare e Futbollit. Ajo do të jetë pjesë e faqes zyrtare të FSHF-së në Internet dhe do të përmbajë informacionet kryesore të Kombëtares shqiptare, stërvitje, intervista dhe informacione të nevojshme, duke filluar nga grumbullimi i kuqezinjve e deri te ndeshjet në grup.
Kështu, faza finale e Kampionatit Evropian të Futbollit do të ketë një pasqyrim më të gjerë për të gjithë shqiptarët, jo vetëm nëpërmjet televizioneve por edhe nëpërmjet internetit. Prania e Kombëtares shqiptare të futbollit në këtë veprimtari sportive, për herë të parë në historinë e futbollit tonë, ka bërë që Federata Shqiptare e Futbollit të krijojë një seksion special në faqen zyrtare të saj.
Kjo iniciativë e re është prezantuar para mediave nga Sekretari i Përgjithshëm i FSHF-së, Ilir Shulku, dhe përfaqësues të zyrës së shtypit në këtë organizëm. Duke filluar nga e hëna, faqja dedikuar Evropianit, do të përmbajë informacione në lidhje me përgatitjet që skuadra kombëtare po bën për finalet e Evropianit Francë 2016, intervista me protagonistë, lajme të ndryshme, bilance, informacione për qytetet dhe stadiumet ku do luajë skuadra jonë, etj.
Kjo është një tjetër risi në vëmendjen e Federatës Shqiptare të Futbollit për Kombëtaren dhe pjesëmarrjen e saj në veprimtarinë më të rëndësishme të vitit.