ASNN – Është çelur këtë të enjte ekspozita e famshme mbi jetën dhe karrierën e ish-futbollistit të madh italian, Paolo Rosi si dhe legjendave të futbollit botëror që kanë lënë gjurmë në memorien e futbolldashësve, një ekspozitë e mbështetur nga Federata Shqiptare e Futbollit (FSHF). Në ceremoninë e zhvilluar pasditen e sotme në ambientet e Muzeut Kombëtar për çeljen e ekspozitës “Paolo Rossi, një djalë i artë dhe legjendat e futbollit” ishin të pranishëm Presidenti i FSHF-së, Armand Duka, Kryeministri Edi Rama, Ambasadori Italian në Shqipëri, Fabricio Buçi, Presidenti i Federatës Italiane të Futbollit, Gabriele Gravina, bashkëshortja e Paolo Rosit, Federika Kapeleti, ish-trajneri Arrigo Saki, ish-futbollistët e famshëm Antonio Kabrini e Marko Tardeli, gjyqtari izraelit i gjysmëfinales së Botërorit 1982, Itali-Brazil, Abraham Klein, si edhe personalitete të futbollit shqiptar dhe përfaqësues të institucioneve të ndryshme.
Presidenti i FSHF-së, Armand Duka përshëndeti hapjen e kësaj ekspozite edhe në Tiranë, pas sukseseve në Romë, Milano, Firence, Torino, Trento, Rimini, Bolonja, Beograd, Venecia dhe Zyrih. Kreu i qeverisë së futbollit shqiptar u shpreh se Paolo Rossi është një figurë futbolli e pavdekshme dhe që ka motivuar e motivon brezin e ri në rritjen e tyre sportive. Ndër të tjera, Presidenti Duka ftoi të gjithë të apasionuarit pas futbollit që të vizitojnë këtë ekspozitë të veçantë.
”Jam shumë i nderuar që të hap këtë ceremoni inagurimi të ekspozitës “Paolo Rosi, një djalë i artë dhe legjendat e futbollit”, – ka thënë ai. – Sot me ne, bashkë me figura té futbollit shqiptar kemi personalitete të rëndësishëm të politikës, diplomacisë dhe të futbollit italian apo qoftë dhe të botës së gjykimit botëror. Bashkë me ne sot është edhe Presidenti i Federatës Italiane të Futbollit. E them me bindje, mik i futbollit shqiptar. Fakti që ka ardhur 4 herë brenda dy viteve në Shqipëri, madje dhe në ditë të vështira, kohë “Covid”-i e tregon më së miri këtë miqësi dhe bashkëpunim të Presidentit me futbollin shqiptar.”
“Gjithashtu edhe Ambasadori i Italisë në Shqipëri, Fabrizio Buçi, një tjetër apasionant pas futbollit dhe mbështetës i vazhdueshëm i aktiviteteve italo-shqiptare si kjo e sotmja, – ka vijuar Duka. – Kemi sot një nga revolucionarët e futbollit italian dhe jo vetëm, por edhe futbollit botëror. Profesor Arrigo Saki. Kemi edhe legjendat e futbollit italian bashkë me ne, Antonio Kabrini dhe Marko Tardeli. I njohim të gjithë si emra, sot kemi kënaqësinë t’i kemi këtu. Gjithashtu edhe një nga figurat e gjykimit botëror, gjyqtari i ndeshjes Brazil-Itali, në vitin 1982, na nderon sot në këtë ceremoni çeljeje të kësaj ekspozite.”
“Dua të ftoj të gjithë futbolldashësit, të apasionuarit e futbollit shqiptar dhe jo vetëm ta vizitojnë këtë ekspozitë nga sot deri më 24 shkurt, falas. Besoj se do të kenë shumë gjëra për të parë, jo vetëm objekte të Rossit, por të shumë figurave të tjera të futbollit europian e botëror”, – ka përfunduar kreu i FSHF-së. Hapësirat e ekspozitës do të përshkruajnë në mënyrë kronologjike jo vetëm jetën dhe karrierën e Paolo Rosit, por të gjithë të apasionuarit pas futbollit do të kenë mundësinë që të shohin relike dhe sende personale që u përkasin personaliteteve më të mëdha të futbollit botëror. Ekspozita do të jetë e hapur nga sot, deri më 24 shkurt në Muzeun Historik Kombëtar.
