ASNN – “Ne po i afrohemi një territori ku mund të mbretërojë kaosi”, – ka thënë të mërkurën një nga krerët ekzekutiv të Premier Ligës, duke paralajmëruar atë që mund të ndodhë në nivelet e futbollit profesionist në Angli e më gjerë. Vetëm dy ditë më parë, shefi ligjor i FIFA-s Emilio Garcia Silvero, e bëri të qartë se nuk mund të detyrojë ligjërisht lojtarët që të qëndrojnë me klubet përkatëse edhe pas mbylljes së kontratave. “FIFA nuk mund të zgjatë kontratat më larg se 30 qershori 2020, por dritaret e merkatos nuk do të jenë të njëjtat”, – ka sqaruar ai.
“Dhe lojtarët nuk do të mund të regjistrohen me klube të reja, merkato nuk hapet me 1 korrik 2020, – pati vijuar zyrtari i FIFA-s. – Nëse huazimi mbaron me 30 qershor 2020, lojtari teorikisht duhet të kthehet në klubin e tij, por dritarja e merkatos do të jetë e mbyllur dhe nuk do të llogaritet as kalimi dhe as si i regjistruar.” Pikërisht ky skenar ka bërë që klubet e Premier Ligës po kërkojnë që sezoni të përfundojë më 30 qershor ose të anulohet. Madje ato janë duke kërkuar që të merret sa më shpejt vendimi për sezonin 2019-2020, raporton “Daily Mail”.
Një grup i klubeve, përfshirë edhe disa që janë duke synuar të marrin pjesë në Kupat e Evropës sezonin e ardhshëm, po shqetësohen për kontratat që janë të lidhura deri në fund të sezonit zyrtar. Krerët e klubeve po frikësohen se, nëse sezoni vazhdon në korrik, atëherë do të përballen me beteja ligjore nga lojtarët dhe partnerët komercialë. Takimi i radhës i klubeve aksionere të Premier Ligës Angleze është parashikuar për më 17 prill dhe klubet duan që temë kryesore e bisedimeve të jetë afati për përfundimin e sezonit.
Të gjitha klubet janë të vetëdijshme për situatën, ndonëse jo të gjitha janë në favor për të caktuar një datë për të përfunduar kampionatin. FIFA ka njoftuar më herët se do të marrë masa të veçanta për të mbrojtur klubet dhe lojtarët, kontratat e të cilëve skadojnë më 30 qershor, që është data përfundimtare e sezonit të zakonshëm në Evropë. Mirëpo, klubet angleze janë këshilluar se ligjet kontraktuale në Angli do të zëvendësonin çdo vendim apo marrëveshje emergjente të prezantuar nga organet qeverisëse të futbollit në vend.
Kjo u mundëson lojtarëve që janë të huazuar apo që mbesin pa kontrata, të largohen nga klubet më 1 korrik 2020, edhe nëse sezoni nuk ka mbaruar ende. Klubet frikësohen se lojtarët mund të shqetësohen se ndonjë dëmtim i mundshëm mund të pengonte transferimin e radhës, e kështu do të vendosnin të mos luanin. Po kështu, ka edhe marrëveshje sponsorizuese të vlefshme deri më 30 qershor 2020, çka mund të krijonte pështjellim, veçanërisht nëse është arritur ndonjë marrëveshje e re me partnerë të rinj komercialë pas asaj date.
