ASNN – Kreu i “Mercedes”-it, Toto Volf pranon se janë duke punuar shumë me dy inxhinierët kryesorë të skuadrës, për të përmirësuar makinën e garës. Ai ka thënë se duhet punuar ende në kthesat e shkurtra, aty ku “Ferrari” është më i shpejtë. E sidomos në ftohjen e makinës. Sepse, pas Silverstounit vijnë dy gara në pista me temperatura tepër të larta, Hokenhaimi dhe Budapesti.
I vrenjtur, me temperatura maksimale prej 23 gradë Celsius dhe shanset për shi prej 30%. Ky është parashikimi i motit që pritet të jetë këtë fundjavë në Silverstoun, pista që do të presë për herë të 53-të Çmimin e Madh të Britanisë në Botërorin e Formulës 1. Si zakonisht, edhe këtë sezon, vëmendja është përqendruar tek garazhi i skuadrës favorite, “Mercedesit”.
Dhe ndryshe nga garat e mëparshme, 5 herë kampionët e botës, nuk e fshehin se pista angleze i përshtatet shumë makinës së tyre. “Edhe pse jemi të parët, mbajtja e kryesimit kërkon përkushtim. Kështu thuhet të paktën, – ka thënë Toto Volfi. – E Silverstouni është një nga pistat tona të preferuara. Por ne duhet të punojmë më shumë në kthesa.”
“Sepse ka disa momente që “Ferrari” është shumë më i shpejtë se ne”, – ka shtuar kreu austriak i skuadrës gjermane. Një tjetër shqetësim për Volfin është edhe ftohja e makinës. “Inxhinierët Brekli dhe Briksuorth janë duke punuar shumë për të përmirësuar ftohjen e makinës. Unë me të vërtetë shpresoj që moti tipik anglez në Silverstoun të na shoqërojë me temperatura të ulëta.”
“Kështu që ne mund të fitojmë kohë dhe të zgjidhim problemet tona. Por nuk ka shumë kohë për të zgjidhur këto probleme për garat e ardhshme të nxehta, si Hokenhaim dhe Budapest. Atje nuk kemi alternativa, na duhet të gjejmë zgjidhjen e duhur”, – ka përfunduar kreu i “Mercedes”-it, Toto Volf.
