ASNN – Piloti i “Ferrari”-t, i pakënaqur me paraqitjen e tij në gjysmën e parë të vitit 2019. Duke i bërë një vlerësim sezonit të tij nga 1-shi deri tek 10-ta, piloti i “Ferrarit”, Sebastian Fetel, ka deklaruar se i jepte vetes një “5”, sepse nuk ishte aspak i lumtur me gjysmën e parë të këtij viti. Piloti gjerman dhe skuadra e tij janë ende në kërkim të një fitoreje pas 12 garash, teksa Formula 1 i drejtohet pushimit të verës. Një sezon të cilin e vlerëson me notën “5”, e ka cilësuar piloti i “Ferrarit”, Sebastian Fetel, sezonin aktual, ku ai dhe skuadra e tij janë ende në kërkim të një fitoreje pas 12 garash, teksa Formula 1 i drejtohet pushimit të verës.
Feteli mban vendin e 4-t të renditjes së përgjithshme të pilotëve, me 156 pikë, thuajse 100 pikë prapa kryesuesit të shkëputur, Ljuis Hemiltonit, që ka 250 pikë, ndërsa para tij në vendin e dytë ndodhet Valteri Botasit i “Mercedesit”, me 188 pikë dhe Maks Verstapeni i “Red Bull”-it, me 181. Një ndëshkim prej 5 sekondash në Çmimin e Madh të Kanadasë, i kushtoi Fetelit dhe “Ferrari”-t fitoren, edhe pse mbërriti i pari në finish. Por piloti gjerman ka vuajtur për të ruajtur statusin e tij përballë sfidës së shokut të tij të skuadrës, të riut nga Montekarlo, Sharl Lëklerk, i cili renditet i 5-ti në kampionat, 24 pikë prapa 4 herë “kampionit” të botës.
Duke i bërë një vlerësim sezonit të tij nga 1-shi deri tek 10-ta, Sebastian Fetel tha se i jepte vetes një “5”, teksa nuk ishte aspak i lumtur me gjysmën e parë të këtij viti. “Mendoj që në përgjithësi kemi vuajtur aty-këtu për të marrë maksimumin nga kjo makinë, – vijoi ai. – Kemi provuar shumë gjëra, prandaj mendoj se është e drejtë kjo që kemi. Qartësisht, kemi kërkuar të nxjerrim më tepër prej saj, sepse njeriu gjithnjë kërkon më tepër, por mendoj se mund të bëj një punë më të mirë në gjysmën e dytë. Dhe, përderisa “5” është numri i makinës sime, atëherë po i jap vetes një “5”.”, – përfundoi piloti gjerman i “Ferrari”-t.
