ASNN – Piloti spanjoll mbron skuadrën sa u përket gabimeve me strategjitë. “Ferrari” është kritikuar mjaft gjatë këtij sezoni, sidomos për gabimet e bëra në strategjitë e garave, që i kanë kushtuar jo pak skuadrës italiane. Por piloti i saj, Karlos Sainz, beson se këto kritika janë të papërligjura, sepse, sipas tij, në rastin e ““Ferrari””-t, çdo gjë ka prirjen të kalojë caqet e së zakonshmes. Kështu, Karlos Sainz i ka dhënë mbështjen e tij skuadrës së strategjisë së “Ferrari”-t, duke këmbëngulur se gabimet e tyre këtë sezon po ekzagjerohen dhe se asnjë skuadër tjetër në Formula 1 nuk i nënshtrohet të njëjtit niveli kriticizmi.
Një kriticizëm që ka spikatur në fakt këtë sezon mbi strategjitë e zgjedhura nga “Ferrari”, të cilat në jo pak raste i kanë kushtuar pikë të vyera, vende në podium apo edhe fitoren pilotëve të saj. Por Sainz beson se këto gabime po ekzagjerohen dhe po eklipsojnë edhe gjërat pozitive. “Mendoj se është shumë e vështirë të përgjithësosh për rastet ku ne duhet të ishim më të guximshëm apo më të kujdesshëm”, – ka deklaruar piloti spanjoll i skuadrës italiane. “Unë mendoj që duhet t’i marrim një nga një dhe t’i analizojmë veç e veç”, – ka theksuar 28-vjeçari, duke vijuar: “Jam i sigurt se, veç e veç, çdo rezultat apo çdo konkluzion do të jetë i ndryshëm.”
“Për mua, gjithçka ka të bëjë me përmirësimin e vazhdueshëm dhe gjetjen e mënyrave për të marrë çdo herë vendimet e duhura, – ka këmbëngulur ai. – Dhe ka patur shumë raste gjatë këtij viti kur ne kemi marrë vendimet e duhura dhe askush nuk ka ardhur të na thotë: “Po, morët vendimin e duhur!” dhe të na përgëzojë. Por, në krahun tjetër, kur janë bërë dy apo 3 gabime, që më tepër kanë ardhur nga dritëshkurtësia, shpërthejnë kritika të pafundme.” Dhe kjo është ajo që e habit pilotin spanjoll, i cili bën krahasimin edhe me raste të ngjashme në kohën kur ishte në skuadra të tjera të Formulës 1.
“Kur je tek “Ferrari”, çdo gjë duket më e madhe, – tha Sainz, duke vijuar: “Edhe fitoret janë më të mëdha, edhe gabimet janë më të mëdha, apo nuk është kështu. Prandaj kjo është diçka me të cilën unë po mësohem, ndërsa edhe skuadra kthehet pas çdo gare për të analizuar gjithçka dhe për të përmirësuar garimin tonë”, – ka përfunduar piloti i “Ferrari”-t, Karlos Sainz.
