Në përfundim të Çmimit të Madh të Abu Dabit, por edhe të këtij sezoni të Formulës 1, kanë folur pilotët protagonistë. “Nuk ka qenë gara më e mirë që kam bërë, – ka thënë Niko Rosbergu i “Mercedes”-it. – Për fat ka mbaruar. Në finale më janë afruar dhe të tjerë nga pas. Tani jam “në qiellin e 7-të”. Është i pashpjegueshëm ky moment dhe gjithçka dua t’ia dedikoj bashkëshortes sime dhe vajzës tonë.”

“Jam i kënaqur që kam përsëritur atë që ka bërë dhe babai im”, – ka përfunduar kampioni i ri i botës. Ndërsa kampioni i shkurorëzuar, piloti tjetër i “Mercedes”-it, Ljuis Hemilton tha: “Ndihem i madh, dua të falënderoj të gjithë ata që kanë ardhur për mua në Abu Dabi, familjen time për të gjithë mbështetjen dhe në mënyrë speciale skuadrën që ka bërë një punë shumë të mirë.”

“Është privilegj të jesh pjesë e kësaj skuadre dhe të marrësh këto suksese që kemi arritur të gjithë së bashku këtë vit”. Ndërsa gjermani Sebastian Fetel i “Ferrari”-t, tha” “Kemi punuar shumë, na është dashur të kalojmë një lumë kritikash këtë vit, disa të drejta dhe të tjerat jo të drejta. Por është një sport i vështirë me kundërshtar shumë të fortë. Ka qenë një vit i vështirë, por është bukur ta mbyllësh në podium për të shpresuar se do të jesh ndryshe vitin e ardhshëm”.