ASNN – Makina tradhton Lëklërkun që kryesonte, Hemiltoni dhe Botasi e parakalojnë. Skuadra e “Mercedesit” ka korrur një tjetër fitore në garën e dytë të sezonit të Formulës 1, pasi Ljuis Hemilton ka përfituar më së miri nga fati i keq që ka goditur makinat e “Ferrarit” dhe ka mbërritur i pari në finish, i ndjekur nga shoku i tij i skuadrës, Botas. Emocionet e garës së të dielës, që u zhvillua në Bahrein, u sollën për sportdashësit drejtpërdrejt dhe ekskluzivisht nga Rrjeti i Radio-Televizionit Shqiptar.
Fati i keq i njërit është padyshim fati i mirë i dikujt tjetër dhe pikërisht kështu ka ndodhur të dielën në pistën e Bahreinit, teksa Ljuis Hemiltoni ka përfituar nga zhgënjimi i Sharl Lëklërkut dhe ka fituar garën e dytë të sezonit të Botërorit të Formulës 1. Piloti i ri i “Ferrarit” nga Monako dukej se ishte në rrugë të mbarë për ta shndërruar në një fitore të parë që në debutim atë nisje nga vendi i parë në pistën arabe. Dhe kështu ishte deri 10 xhiro para fundit të Çmimit të Madh të Bahreinit.
Atëherë, kur një problem me baterinë e “Ferrarit” të tij, e detyroi 22-vjeçarin që t’i dorëzonte “Mercedesit” të Ljuis Hemiltonit kreun e garës që ai e kishte dominuar duke parakaluar edhe shokun e tij të skuadrës. Hemiltoni vijoi të vuloste triumfin e dyfishtë të “Mercedesit”, i dyti radhazi në po aq gara të këtij sezoni, duke lënë pas shokun e tij të skuadrës, Valteri Botasin.
Ndërkohë, futja në pistë e makinës së sigurisë për shkak të daljes në të njëjtën kohë nga gara të dy makinave “Renault”, e shpëtoi Lëklërkun nga zbritja nga podiumi, që sidoqoftë ishte i pari për të në Formula 1. Kjo ishte një mbyllje zhgënjyese për pilotin e ri të Ferrarit, i cili do të kishte shkruar emrin e tij si fituesi i 108-të i një gare në historinë e Formulës.
Ndërkaq, edhe makina tjetër e “Ferrarit”, ajo e Sebastian Fetelit, që gjithashtu ishte në rrugë të mbarë për një vend në podium pas Lëklërkut, humbi kontrollin në duelin me Ljuis Hemiltonin, përpara se të dëmtonte edhe pjesën e parë të makinës. Në fund, ai u detyrua të kënaqej me vendin e 5-të, pas “Red Bullit” të Maks Verstapenit. Pas dy garave të para, skuadra gjermane e “Mercedesit” kryeson e shkëputur renditjen e konstruktorëve, ndërsa edhe të dy pilotët e saj, Botas dhe Hemilton, kryesojnë renditjen e pilotëve.
