ASNN – Pak nga pak ditët po kalojnë, normaliteti po rikthehet në ato vende ku ka kaluar më e keqja e epidemisë së virusit “Covid-19” dhe kthimi i konkurrencës po merr formë. Në rastin e Formulës 1, data e shënuar me të kuqe në kalendar është 5 korriku, kur Botërori 2020 është planifikuar të fillojë me dy gara madhështore në pistën e “Red Bull Ring” në Austri.

Por autoritetet sportive kanë dhënë informacione se si do të jetë rikthimi në asfalt dhe sa do të jetë numri i personave të lejuar për çdo skuadër që do të marrin pjesë në garë. Ashtu si edhe testet për Covid-19 që do të bëhen çdo ditë për të gjithë anëtarët e skuadrave. Sipas “Racefans.net”, pjesëtarët e çdo skuadre nuk do të kalojnë numrin 80, nga të cilët jo më shumë se 60 do të jenë ata që punojnë në dy makinat e secilit ekip.

Një masë e vendosur nga Zherard Saijant, Presidenti i Komisionit Mjekësor të FIA, e cila nuk do të ndryshojë në asnjë garë dhe do të jetë e detyrueshme në të gjitha. Një ulje e ndjeshme e numrit të anëtarëve të çdo skuadre, pra më të nevojshmit, do të bëjë që të ulen edhe shpenzimet e skuadrave për çdo garë. Tani gjithçka mbetet është që të shpresohet që nuk do të ketë ndryshime të situatës së virusit korona deri në nisjen e Botërorit të Formulës 1.