ASNN – Piloti i “Mercedesit” paralajmëron skuadrën në prag të sezonit të ri në Australi. Ljuis Hemiltoni  ka deklaruar se skuadra gjermane duhet të luftojë më fort këtë sezon për të mposhtur “Ferrarin”, por, në të njëjtën kohë, theksoi se nuk duhet të sforcohet më tepër se ç’duhet, pasi kjo mund të çojë në gabime të kushtueshme. Piloti britanik i “Mercedesit” foli në prag të garës hapëse të sezonit, Çmimit të Madh të Australisë, që mbahet fundjavën e ardhshme.

Ljuis Hemilton e ka paralajmëruar “Mercedesin” se nuk duhet të vihet nën presion nga epërsia, të paktën në letër, e rivales së Formula 1, “Ferrarit”, në fillimin e këtij sezoni. Skuadra italiane po shihet si favorite pas testeve parasezonale dhe Hemiltoni e ka pranuar se “Kokëkuqja” e “Maranelos” mund të jetë deri në gjysmë sekonde më e shpejtë se “Mercedesi”, në prag të garës hapëse të sezonit të ri, Çmimit të Madh të Australisë.

Hemiltoni  deklaroi se skuadra gjermane duhet të luftojë më fort këtë sezon për të mposhtur “Ferrarin”, por, në të njëjtën kohë, theksoi se nuk duhet të sforcohet më tepër se ç’duhet, pasi kjo mund të çojë në gabime të kushtueshme. “Natyrisht që e bën gjithçka më të vështirë për ne, – pohoi Hemiltoni, duke iu referuar formës së “Ferrarit”. –  Mendoj se që sezonin e shkuar, ne ishim prapa me paraqitje, por ia dolëm me strategjitë dhe aftësinë personale, prandaj këtë sezon duhet të japim shumë më tepër.”

“Por duhet të jemi të kujdesshëm në këto rrethana, pasi mund ta teprosh dhe, si rezultat, mund të gabosh. Ne kemi ekuipazhin më të mirë në këtë skuadër, kemi përvojën dhe nuk është rastësi që jemi kampionë të botës. Por duhet të jemi vigjilentë dhe të ruajmë barazpeshën. Por, si pilot, më duhet të shikoj se çfarë mund të bëj më tepër dhe, për momentin, nuk është se kam një ide të qartë për këtë”, – përfundoi 5 herë kampioni i botës.

Ai mendon gjithashtu se “Ferrari” mund të jetë duke marrë frytet e zhvendosjes së vëmendjes tek 2019-ta më herët sesa ç’bëri “Mercedesi”.