ASNN – “U shqetësova, sepse mendova që tifozët mund të hyjnë në pistë për të festuar, ndërkohë që ne vazhdonim me shpejtësi maksimale”. Kështu ka deklaruar piloti gjerman i “Ferrari”-t, Sebastian Fetel, duke iu referuar incidentit kur flamuri i finishit u valëvit gabimisht një xhiro para përfundimit zyrtar të garës. Sikundër i gjithë ky sezon, edhe emocionet e kësaj gare, që u zhvillua të dielën, u sollën për sportdashësit drejtpërdrejt nga Rrjeti i Radio-Televizionit Shqiptar.
Fituesi i Çmimit të madh të Kanadasë, Sebastian Fetel, tha se ai ishte i shqetësuar sepse mendoi që tifozët e pranishëm në cirkuitin e Formula 1 do të futeshin në pistë, kur flamuri i finishit u valëvit gabimisht një xhiro para përfundimit zyrtar të garës. Dhe, në fakt, rezultati përfundimtar i garës u shpall duke u mbështetur në 68 xhiro dhe në 70 xhirot zyrtare, pasi modelja Uini Harlou e valëviti flamurin më herët se ç’duhej kur Feteli kaloi vijën e xhiros së fundit.
Harlou tha se “ajo thjesht po ndiqte udhëzimet”, kurse piloti gjerman tha se ai dërgoi një mesazh në radio për këtë episod, duke shpresuar se do të parandalonte çoroditjen e shkaktuar. “Fatmirësisht, ne kishim komunikim në radio, fatmirësisht kishin numeratorin e xhirove në makinë dhe tabela e pistës ishte e saktë, – tha gjermani i “Ferrari”-t pas garës. – Por, sikur të mos i kishim këto, atëherë ti e heq këmbën nga gazi dhe, duke qenë në kryesim, pret që kështu të bëjnë edhe të tjerët.”
“U shqetësova, sepse mendova që tifozët mund të hyjnë në pistë për të festuar, ndërkohë që ne vazhdonim me shpejtësi maksimale, – ka vijuar ai. – Në fakt, edhe disa nga marshallët e garës filluan të valëvisnin flamujt e festës, por unë i thashë skuadrës në radio që gara nuk ka përfunduar, dhe ata ma konfirmuan, duke më thënë “jo, jo, nuk ka përfunduar… vazhdo, jepi akoma…” Por çoroditja përfshiu edhe pilotët pas tij, teksa Kimi Raikonen frenoi fillimisht, duke e rritur më pas shpejtësinë kur e kuptoi se nuk ishte xhiroja e fundit e duke penguar në ato çaste Karlos Sainzin.
