ASNN – Tashmë, më shumë mundësi për të rritur fuqinë motorike. Federata Botërore e Automobilizmit (FIA) ka vendosur të rrisë kufirin e buxhetit tavan për skuadrat e Formulës 1. Shtohen me 1.2 milionë dollarë shpenzimet për rritjen e nivelit të makinave. “Ferrari”, “Mercedes”-i dhe “Red Bull”-i janë gati për të bërë ndryshimet e radhës. Pas muajsh mosmarrëveshjesh dhe polemikash rreth ndikimit të inflacionit në kufirin e kostos së Formula 1, është miratuar më në fund një rezolutë, në prag të Çmimit të Madh të Austrisë.
Ky sport supozohet se e ka konkurrencën midis pilotëve në pistë dhe midis njerëzve të zgjuar që projektojnë dhe drejtojnë makinat e tyre. Asnjëherë nuk ishte menduar se do të ishte një garë edhe mes kontabilistëve financiarë. Formula 1 për momentin është në një situatë të mirë ekonomike sepse ka vendosur një kufi kostoje, që i frenon shpenzimet. Po të mos ishte vendosur ky kufi nga FIA, atëherë me siguri që disa skuadra do të ishin larguar nga F1. Edhe investitorët e kanë më të lehtë të përfshihen në këtë sport.
Tani u vendos rritja prej 3.1% të kufirit të shpenzimeve të tyre. Gjë që do t’u krijojë një hapësirë të vogël skuadrave për të lëvizur. Kufiri bazë i kostos për vitin 2022 ishte 140.0 milionë dollarë amerikanë, të cilave iu shtuan 1.2 milion duke bërë një total prej 141.2 milionë dollarësh. Tre shpenzuesit më të mëdhenj mirëpritën rritjen prej 3.1%, edhe pse donin një shifër më të madhe. “Ishte pozitive sepse morëm një vendim të mirë, – tha Matia Binoto i “Ferrari”-t. – Disa ekipe tashmë e kishin shkelur kufirin buxhetor këtë vit dhe gjetja e një kompromisi ishte e rëndësishme.”
“Eshtë një rrije e paktë e buxhetit por pozitive”, – përfundoi italiani. “Sigurisht që ndihmon, – tha Kristian Horneri i “Red Bull”-it. – Mendoj se kjo rritje është shumë për disa skuadra por nuk mjafton sërish për skuadrat kryesore. Megjithatë ishte një çështje që gjeti një terren të mesëm. Dhe nuk ka të bëjë vetëm me këtë vit, ka të bëjë edhe me vitet pasuese gjithashtu. Kështu që unë mendoj se ishte gjëja më e mirë për t’u bërë.” Nga drejtuesit e 3 skuadrave të mëdha, Toto Volfi ishte ndoshta më pak entuziasti.
“Shumë pak për skuadrat e mëdha, mendoj, – tha austriaku i “Mercedes”-it. – Për shkak se çmimet e energjisë, inflacioni dhe transporti i mallrave po rriten në qiell. Është shumë për skuadrat e vogla. Dakort. Por sërish kjo rritje e buxhetit nuk zgjidh problemet tona.” Ekziston rreziku se nëse vetëm një ose dy skuadra e kalojnë kufirin e ri, dhe të tjerët luajnë lojën dhe provojnë se është e mundur të qëndrosh poshtë tij, atëherë autoritetet e larta të Formulës 1 mund të mos jenë shumë dashamirës. Ky është rreziku me të cilin do të përballen tashmë skuadrat e mëdha.
