ASNN – Përkundër asaj që mendojnë të gjithë, Binoto e sheh Lëklerkun dhe Fetelin si kombinimin perfekt për të arritur suksesin, megjithëse kundërshtojnë filozofinë e tij, atë të pilotit lider dhe pilotit ndihmës. Deri në vitin 2020, Feteli dhe Lëklerku do të vazhdojnë bashkëjetesën te “Ferrari”. Por duhet parë fillimisht si do shkojnë deri në fund të këtij sezoni. “Ferrari” është ekipi që po merr iniciativën gjatë fundjavave, me strategji fituese, të cilat jo gjithmonë funksionojnë mirë, e me dy pilotë që parakalojnë njëri-tjetrin me ose pa dëshirë.
Skuadra është ajo që po luan me të dy pilotët e vet, si me Lëklerkuun, ashtu edhe me Fetelin. Tek “Mercedes”-i, ata përdorin Bottas si ndihmës, për të bllokuar sulmet e rivalëve, ndërsa Hemiltoni fiton, tek “Red Bull”-i nuk mund ta krahasosh askënd me Verstapenin. Ndërkohë, që ajo që po ndodh me dy pilotët e vet, është një nga argumentet që po ngacmojnë “Maranelon” për vitin 2020. “Unë jam shumë i lumtur me pilotët që kemi, është një kombinim i përsosur midis përvojës dhe një të riu të talentuar”, – thotë kreu i skuadrës italiane.
“Për Sharlin është thelbësore që të kemi Sebastianin dhe unë mendoj se ne nuk po bëjmë gabim. Mendoj se ne e kuptojmë atë që duhet të bëjmë dhe nuk e shoh atë si problem apo kufizim”, – justifikohet Binoto, një avokat i fortë i skemës lider-ndihmës, por që është i detyruar të bëjë një përjashtim, tani për tani. Ndërsa për të ardhmen përtej vitit 2021 nuk ka dyshim, Lëklerku është i zgjedhuri. Finalja e sezonit për makinën “SF90” është gjithashtu emocionuese: 4 nisje radhazi nga vendi i parë dhe një ritëm për të fituar gjithashtu 4 gara, megjithëse ato mbeten 3.
Makina e sezonit të ardhshëm është gati dhe duket se nuk ka shumë përmirësime nga ajo e sivjetshmja. Tashmë për “Ferrari”-n mbetet ta mbyllin sezonin 2019 me më shumë pikë sesa në vitin 2019. Gjithashtu, në garat e mbetura skuadra e kuqe do të vazhdojë të tregojë forcën e saj me zemërimin e katër herë kampionit të botës dhe shpejtësinë e gjeniut nga Monako. Por si do jetë 2020 për “Ferrari”-n me këta dy pilotë, mbetet për t’u parë.
