ASNN – Politika kërkon që të përfitojë sa më shumë nga ngjarjet e ndodhura në ndeshjen Serbi-Shqipëri. I pari e bëri Lulzim Basha, që një ditë pas ndeshjes e nderoi ekipin Kombëtar me titullin “Mirënjohja e Qytetit. Këtë shembull e ka ndjekur edhe Bashkia e Vlorës, Kamzës dhe Bajram Currit. Me motivacionin për mbrojtjen e flamurit dhe simboleve kombëtare edhe Këshilli bashkiak i Vlorës në një mbledhje jashtë radhe miratoi dhënien e titullit “Qytetar Nderi” për ekipin kombëtar dhe kreun e Federatës Shqiptare të Futbollit, Armando Duka.
Në motivacion shkruhet: “Për atë që bënë në fushën e blertë të Beogradit që u kthye në fushën e dinjitetit tonë kombëtar. Ata luftuan për mbrojtjen e simboleve tona kombëtare, luftuan si në një luftë të vërtetë, sepse lufta e vërtetë është lufta për mbrojtjen e flamurit dhe flamuri e ka shtëpinë në Vlorë dhe Vlora ka Ismail Qemalin, vlonjati që së bashku me Isa Boletinin fluturuan mbi Beograd dhe turpëruan Serbinë”. Edhe Bashkia e Kamzës ka nderuar Kombëtaren me titullin “Qytetar Nderi”, edhe pse ekipin ynë nuk është person fizik.
Ndërsa Bashkia e Bajram Currit ka nderuar me titullin “Qytetar Nderi” kapitenin e Kombëtares, Lorik Cana. Kjo mund të shfrytëzohet politikisht nga Federata Serbe e Futbollit, e cila mund të argumentojë se futbollistët tanë janë nderuar nga politika shqiptare për veprime politike në Beograd. Bashkia e Qytetit të Vlorës ka shpallur “qytetarë nderi” futbollistët e kombëtares shqiptare dhe presidentin e Federatës Shqiptare të Futbollit, Armand Duka.
Për këtë qëllim u zhvillua një mbledhje e posaçme e Këshillit Bashkiak, gjatë së cilës, kryetarja e këtij këshilli, Evisa Lushi ka propozuar që të nderohen futbollistët e kombëtares shqiptare dhe presidenti i FSHF-së, Armand Duka, me titullin “qytetar nderi i qytetit” të Vlorës. Kryetarja Lushi ka nënvizuar faktin se nuk ka vend më të mirë se Vlora, qyteti ku Ismail Qemali ngriti flamurin kombëtar dhe shpalli pavarësinë, të ndihen të nderuar pikërisht ata që mbrojtën flamurin në stadiumin e Beogradit.
Të 27 këshilltarët e pranishëm votuan pro këtij propozimi te Bashkisë Vlore dhe kryetares së Këshillit Bashkiak, Evisa Lushi. Kryetari i Bashkisë së Vlorës, Shpëtim Gjika ka siguruar të gjithë, se në datën 28 nëntor 2014, ditën e shpalljes së pavarësisë së Shqipërisë, futbollistët do të jenë prezent në Vlorë për të marrë titullin nderi i qytetit të Vlorës.
