ASNN – Kategoria Superiore e Kampionatit Kombëtar të Futbollit luan të dielën dhe të hënën ndeshjet e javës së saj të 22-të. Tri ndeshjet e para janë luajtur sot dhe, duke nisur nga ora 14:00, Laçi ka pritur në fushën e vet Bylisin dhe ballshiotët kanë fituar me rezultatin 1-0.
Ndërsa Tërbuni i Pukës ka qenë mysafir në Durrës, ku është ndeshur me Teutën, në takimin që u mbyll në fitoren 2-1 të vendasve. Ndërkaq, duke nisur nga ora 17:00, në Vlorë përballen me njëra-tjetrën Flamurtari dhe Vllaznia, në ndeshjen që u fitua nga vendasit me rezultatin 2-0.
Kështi, janë zhvilluar të dielën 3 ndeshjet e para të javës së 22-të të Superiores dhe bie në sy surpriza e Bylisit në Laç, ku ballshiotët kanë arritur të fitojnë me një gol në pjesën e dytë me autor Bilalin. Edhe pse Laçi luajti shumë mirë gjatë gjithë ndeshjes golin e vetëm e bëri skuadra e drejtuar nga Zilxhoviç.
Dhe, me 19 pikë, aq sa ka edhe Vllaznia, ballshiotët i largohen disi zonës së ftohtë. Një fitore po kaq të rëndësishme ka arritur edhe Flamurtari në Vlorë përballë Vllaznisë. Skuadra vlonjate ka fituar 2-0 me dy golat e shënuar nga një për çdo pjesë. Në fillim, Lushtaku kalon në epërsi vendasit, në mbylljen e 45 minutave të para.
Dhe me fillimin e së dytës Telushi dyfishon shifrat duke siguruar këtë sukses për skuadrën që drejtohet nga trajneri Zekerija Ramadani. Edhe Teuta ka marrë një fitore të rëndësishme që e mban në vendin e katërt në kuotën e 37 pikëve. Durrsakët fitojnë 2-1 përballë Tërbunit në momentet e fundit.
Pukjanët kanë luajtur shumë mirë në “Niko Dovana” por është Dita, i cili, pasi zhbllokon ndeshjen në minutën e 37-të, arrin të zhvlerësojë në minutën e 7-të shtesë edhe golin e Karakaçit, duke rikthyer tek suksesi ekipin e trajnerit Gugash Magani, pas eliminimit nga Kupa në mesjavë.
Dy takimet e tjera të kësaj jave dhe ato më të rëndësishmit, që vënë përballë njëra-tjetrës skuadrat e kreut, luhen të hënën, duke nisur nga ora 18:00. Në kryeqytet, Partizani përballet me Kukësin duke synuar të mos mbetet prapa në betejën për titull, ku po e shikon Skënderbeun t’i largohet gjithnjë e më tepër në horizontin e kreut.
Sfida midis Partizanit dhe Kukësit do të sillet për sportdashësit drejtpërdrejt nga Rrjeti i Radio-Televizionit Shqiptar. Nga ana e tyre, korçarët presin në fushën e tyre Tiranën, në një duel që premton spektakël.
