ASNN – Tirana përmbys Kamzën dhe shpreson mbijetesën, Flamurtari frenon Teutën në Durrës. Java e 19-të e Kategorisë Superiore mund të thuhet se ka nxjerrë vetëm një të fituar të madh, Partizanin, i cili fitoi në udhëtim ndaj Skënderbeut ditën e premte dhe u shkëput në kryesim me 5 pikë nga ndjekësi më i afërt, që është Kukësi. Pas zhgënjimit të verilindorëve në duelin kundër Laçit të shtunën, këtë të diel ishte radha e Teutës të frenohej, pasi nuk ia doli të marrë pikët maksimale kundër Flamurtarit.

U kishte marrë vlonjatëve sulmuesin Bushiç një ditë më parë, ndërsa sot tentoi t’i mposhtë, por Flamurtari u tregua i fortë, duke barazuar 1-1. Idriz Batha shënoi me 11-metërsh në minutën e 13-të për ekipin e Flamurtarit, duke e bërë situatën interesante në Stadiumin “Niko Dovana” të Durrësit. Por Teuta do të reflektonte shpejt dhe barazoi në minutën e 26-të me Traorenë. Pra pjesa e parë u mbyll në barazpeshë 1-1, duke i dhënë mundësinë trajnerit Bledi Shkëmbi të përmirësonte disa aspekte të lojës.

Një tjetër shans do të vinte për Teutën për ta fituar ndeshjen pas minutës së 56-të, pasi Franc Veliu doli me karton të kuq, duke e lënë Flamurtarin me 10 vetë dhe duke i bërë vlonjatët të vihen në kushte mbrojtëse për të mos dalë pa pikë. Skema funksionon, sepse, sado që Teuta ushtroi trysni në vijën e parë sulmuese, sërish kuqezinjtë nga Vlora ia dolën të mos thyhen, duke e mbyllur këtë ndeshje në barazim 1-1 dhe duke marrë një pikë me vlerë nga një takim mjaft i vështirë.

Pas kësaj ndeshjeje, Teuta ngjitet në 34 pikë, por mbetet në vend të tretë, pas Partizanit dhe Kukësit, kurse Flamurtari shkon në 29 pikë por nuk e braktis vendin e 6-të, që e mbante dhe më parë. Pra për të dyja skuadrat ishte qëndrim në vendnumëro, megjithëse e humbur ishte Teuta që nuk shfrytëzoi as daljen me të kuqe të Veliut e as avantazhin që buronte nga elementi fushë.

Kategoria Superiore

Java e 19-të

Të premten, 25 janar 2019:

Skënderbeu – Partizani       0-1

Të shtunën, 26 janar 2019:

Kukësi – Laçi                         0-0

Të dielën, 27 janar 2019:

Luftëtari – Kastrioti                1-5

Tirana – Kamza                     4-1

Teuta – Flamurtari                1-1

Renditja

Nr.       Skuadra         Pikë

1. Partizani        40
2. Kukësi            35
3. Teuta              34
4. Laçi                 31
5. Skënderbeu  30
6. Flamurtari      29
7. Tirana             20
8. Luftëtari         17
9. Kamza            15
10. Kastrioti 13