ASNN – Bylisi ka mundur Tërbunin 2-0 në ndeshjen finale duke u shpallur “kampion” i Kategorisë së Parë të Kampionatit Kombëtar të Futbollit. Për skuadrën ballshjote, golat u realizuan nga Mustafaraj dhe Dhrami. Trofeun skuadrës “kampione” ia ka dorëzuar Presidenti i FSHF-së, Armando Duka.
Bylis është kështu “kampion” i Kategorisë së Parë për edicionin 2014-2015. Në finalen e luajtur në Stadiumin “Elbasan Arena”, djemtë që drejtohen nga Roland Nenaj kanë mundur 2-0 Tërbunin, skuadrën fituese të grupit A. Për skuadrën pukjane kjo është humbja e parë sezonale.
Ndeshja nis vrullshëm nga ana e të dyja skuadrave. Janë pukjanët që kontrollojnë lojën teksa rrezikojnë me anë të Rrocës, që në minutën e 3-të. Djemtë e trajnerit Elvis Plori luajnë mjaft mirë dhe rrezikojnë por pa mundur të finalizojnë. 45 minutat e para mbyllen kështu në barazim pa gola.
Në pjesën e dytë Bylis ndryshon ritëm dhe arrin të shënojë me anë të Mustafarajit, që realizon në minutën e 58-të. Tërbuni nuk dorëzohet por duket se fati nuk është në anën e tyre në këtë sfidë, teksa Çutra dhe Agastra janë fare pranë golit, por shtyllat bëhen pengesë në realizimin e golit.
Për të vulosur rezultatin mendon Dhrami, i cili, në minutat e fundit shtesë të takimit shënon golin e dytë. Trofeun e “kampiones” të Kategorisë së Parë, Bylisit ia dorëzon presidenti i FSHF-së, Armand Duka. Me marrjen e titullit, Bylisi përfiton një shumë prej 3 milionë lekësh.
