ASNN – Përtej pasojave që pritet të vijojnë pas dorëheqjes së papritur të Sep Blaterit, FIFA po përvijon, për herë të parë në 34 vitet e fundit, të ardhmen e saj pa zviceranin. Ndonëse ende nuk ka nisur procesi i përzgjedhjes dhe fushata, mediat ndërkombëtare kanë përpiluar një listë të kandidatëve potencialë, që mund të konkurrojnë për postin e drejtuesit të organizmit që qeveris futbollin botëror.
Dorëheqja e papritur, por e mirëpritur nga bota e futbollit, e Sep Blaterit nga posti i presidentit të FIFA-s, përveçse ka tronditur organizmin që qeveris sportin më të bukur në botë, i ka dhë shkas edhe hipotezave përsa i përket atij që do ta zëvendësojë në këtë detyrë. Natyrisht, personi që do ta zëvendësojë 80-vjeçarin zviceran, do të përcaktojë edhe kursin që do të marrë ky organizëm në të ardhmen.
Në krye të listës së kandidatëve është padyshim ai që e çoi Blaterin në raundin e dytë të votimit të 29 majit, princi jordanez Ali Bin Al Husein, i cili ka shprehur gatishmërinë të kandidojë sërish nëse i kërkohet. Por një kandidat jo më pak i fortë se arabi, është francezi Mishel Platini, i cili shihet si zëvendësuesi i natyrshëm i Blater, duke qenë prej vitesh në krye të organizmit më të fortë kontinental, UEFA-s.
Por dy të parët kërcënohen nga një kandidat në hije, por që shihet si mëkëmbës i Blaterit në krye të FIFA-s, Sheiku Ahmad al-Fahad al-Sabah, kuvajtjani që është bërë një lojtar i fuqishëm në prapaskenë, duke qenë vendimtar në zgjedhjen e Tomas Bahut në krye të Komitetit Olimpik Ndërkombëtar. Një tjetër mëkëmbës i Blaterit është kamerunasi Isa Hajatu, kreu i futbollit afrikan, që sidoqoftë është po aq i njollosur me akuza korrupsioni.
Në fakt, në rast të një largimi të shpejtë të Blaterit, është afrikani ai që e merr postin e presidentit si i përkoshëm. Kandidatë të tjerë, që janë konsideruar më tepër produkt mediatik sesa rivalë realë, janë presidentit i Federatës Holandeze të Futbollit, Majkëll Van Praag, ish-Sekretari i Përgjithshëm i FIFA-s, Zherom Shampanjë, ish-futbollisti i mirënjohur portugez, Luis Figo, dhe ish-futbollisti francez, David Zhinola.
