ASNN – Federatat e futbollit kanë përkrahur planin për zgjerimin e Kampionatit Botëror nga 32, deri në 48 përfaqësuese, ka thënë presidenti i FIFA-s, Xhani Infantino. Kreu i organizmit që qeveris futbollin botëror ka thënë se shtimi i përfaqësueseve në Botëror është i mundur të realizohet në periudhën e njëjtë kohore të garës që është mbajtur deri më tani.
Infantino ka thënë se federatat favorizojnë këtë ndryshim, duke këshilluar FIFA-n se mund të ketë një Botëror edhe me 40 përfaqësuese, por presidenti ka thënë se gara me 48 përfaqësuese është më e favorshme si strukturë. Ndërkohë, propozimi i presidentit të FIFA-s, Infantino, për zgjerimin e Botërorit, po has një qëndresë të fortë nga klubet evropiane të futbollit, të cilët e quajnë idenë të papranueshme.
Kështu, klubet më të mëdha të Evropës kanë ngritur ditët e fundit zërin e tyre, duke paraqitur kundërshtimin e tyre për propozimin e Xhani Infantinos që FIFA duhet ta zgjerojë numrin e përfaqësueseve pjesëmarrëse në fazën finale të Botërorit të 2026-ës. Dhe, sipas gjasave, ky propozim mund të miratohet nga Këshilli i FIFA-s në 10-ditëshin e parë të janarit, për t’ju përcjellë pastaj Kongresit në maj të vitit të ardhshëm.
Por Shoqata e Klubeve të Evropës, që përfaqëson më tepër se 200 klubet më të mëdha të kontinentit të vjetër. Sipas një deklarate të kësaj shoqate, “numri i ndeshjeve që luhen gjatë gjithë vitit ka arritur një nivel të papranueshëm”. Veçanërisht për futbollistët që luajnë edhe me skuadra përfaqësuese, – vijon deklarata. – Për këtë arsye, Shoqata e Klubeve të Evropës e kundërshton këtë nismë dhe ia ka bërë të qartë edhe Infantinos”.
Ndërsa kreu i kësaj shoqate, Karl-Hainc Rumenige, i cili është edhe president i kampionëve të Gjermanisë, Bajernit të Mynihut, shtoi se “ne duhet të përqendrohemi sërish tek sporti. “Politika dhe komercializmi nuk duhet të jetë përparësia kryesore në futboll dhe, për të mirën e tifozëve dhe lojtarëve, ne i bëjmë thirrje FIFA-s të mos e rrisë numrin e e përfaqësueseve pjesëmarrëse në fazën finale të Botërorit të 2026-ës”, – përfundoi Rumenige.
