ASNN – Kapelo vlerëson Leo Mesin: Është gjeni i fushës së futbollit, por të fitosh një Botëror i vetëm është e pamundur. Trajneri i njohur italian, Fabio Kapelo, ka folur për gazetën e madhe spanjoll “AS”, duke komentuar ecurinë e Realit të Madridit, talentet e spikatura të futbollit gjatë sezonit të fundit, përfshi edhe brazilianin Vinicius që ka pritshmëri të mëdha.
Por edhe për shkëlqimin e pandërprerë të argjentinasit Lionel Mesi, i cili po korr suksese të pabesueshme në karrierën e tij dhe po njeh një dimension të jashtëzakonshëm të futbollit, atë dimension që lojën me top e shndërron në art. “Sipas mendimit tim, Lionel Mesi nuk është një futbollist, – ka thënë italiani. – Ai është një gjeni i futbollit botëror.”
“Nëse deri më sot nuk ka arritur të ngrejë lart kupën e botës, kjo ka ndodhur sepse asnjë lojtar nuk e bën dot i vetëm diçka të tillë, – ka vijuar Kapelo. – Leo ka bërë maksimumin në cdo kampionat botëror ku ka marrë pjesë. Futbolli luhet me 11 lojtarë dhe i vetëm askush nuk fiton dot, sado i zoti të jetë.” “Pleshti” argjentinas vijon të shkëlqejë edhe këtë sezon.
Ai ka shënuar 22 gola në La Liga spanjolle, ka dhënë 14 pasime ideale për gol dhe konsiderohet favorit absolut për të fituar “Këpucën e Artë” jo vetëm në Spanjë, por edhe në Evropë. Leo po merr “për dore” Barcelonën drejt triumfeve të reja, sepse skuadra këtë edicion është në valle për të tre trofetë sezonalë.
