ASNN – Triumfon pas 11-metërshve ndaj Spanjës në gjysmëfinale, teksa 120 minutat u mbyllën 1-1. “Euro 2020” ka luajtur të martën përballjen e parë të gjysmëfinaleve, duke përcaktuar Italinë si finalisten e parë të tij. Italianët triumfuan pas 11-metërshve ndaj Spanjës, teksa 120 minutat u mbyllën 1-1, që janë Danimarka dhe Anglia. Kjo përballje u soll për sportdashësit drejtpërdrejt nga Rrjeti i Televizionit Shqiptar, që do të përcjellë të mërkurën edhe emocionet e duelit tjetër, Danimarkë-Angli.
Ka qenë një gjysmëfinale epike ajo e para e Kampionatit të 16-të Evropian të Futbollit, teska Italia dhe Spanja kanë dhuruar spektakël, emocione dhe drithërima deri në fund, teksa gjithçka është vendosur nga goditjet nga pika e bardhë e 11-metërshve. Në fakt, përballja që u soll për sportdashësit drejtpërdrejt dhe nën komentin e Dritan Shakohëxhës nga stadiumi mitik “Uembli” i Londrës nga Rrjeti i Radio-Televizionit Shqiptar, ka parë dy skuadrat të vijnë me paraqitje me kontraste në këtë duel, teksa Italia kishte bindur në 5 përballjet e deritanishme.
Ndërsa Spanja me një paraqitje plot dritëhije. Por, përkundër kësaj, janë iberikët që e kontrollojnë më tepër lojën dhe topin në 45 minutat e para, duke ndërtuar edhe raste të volitshme për shënim, por ka gjetur përpara gardianin e portës italiane, Donaruma. Në anën tjetër, edhe Italia nuk ka ndenjur duarkryq, madje në fundin e pjesës së parë godet edhe shtyllën e portës spanjolle. Sidoqoftë, me rrjeta të paprekura është mbyllur pjesa e parë, ndërsa e dyta është e luftuar, me një lojë të hapur dhe me të dy ekipet që guxojnë.
Dhe është Italia që e gjen e para rrugën e rrjetës pas një ore lojë, me anë të Kiezës. Megjithatë, spanjollët nuk do të dorëzohen dhe do të këmbëngulin dhe kjo këmbëngulje do të shpërblehet 11 minuta para fundit të kohës së rregullt, kur Morata do të barazojë shifrat. Minutat e mbetura dhe ato shtesë të kohës së rregullt nuk sjellin gola të tjerë dhe gjithçka u drejtohet dy pjesëve shtesë nga 15 minuta secila, të cilat në fakt janë karakterizuar nga loja e kujdesshme e të dy ekipeve, që më tepër u ruajtën për të mos pësuar gol.
E për rrjedhojë, edhe kjo gjysmëorë shtesë nuk solli gola të tjerë, duke ua lënë fjalën goditjeve nga pika e bardhë e 11-metërshve, aty ku të dyja skuadrat e kanë nisur keq, duke i humbur të parat. Por pritja e goditjes së 4-t të spanjollëve nga portieri Donaruma, u ka dhënë mundësi italanianëve që me goditjen e saktë të brazilianit të natyralizuar, Zhorzhinjo, të sigurojë vendin në finalen e madhe të 11 korrikut.
