ASNN – Përveç ndeshjes Francë-Shqipëri, sot luhen edhe Rusi-Sllovaki e Zvicër-Rumani. Në orën 15.00 Rusia luan ndeshjen e provës. Jo vetëm për rezultatin, por edhe për të bindur UEFA-n se tifozët e vet nuk do të bëjnë më trazira në Francë.
Federata Ruse ka marrë paralajmërimin se nëse tifozët e saj, do të shkaktojnë incidente të tjera të rënda ashtu si në ndeshjen me Anglinë, ajo do të përjashtohet nga “Euro 2016”-ta.
Evropiani do të vazhdojë me ndeshjen e orës 18.00, atë midis Zvicrës dhe Rumanisë, e vlefshme për grupin A. Zvicra vjen në këtë sfidë me 3 pikë të fituara nga ndeshja me Shqipërinë.
Ndërsa Rumania nuk ka asnjë pikë pasi u mund nga Franca në ndeshjen hapëse të evropianit. Bilanci i fitoreve midis këtyre dy skuadrave është i barabartë, nga 5 secila, ndërsa 2 kanë përfunduar në barazim.