ASNN – Italia kualifikohet për në çerekfinalet e “Euro 2016”-së, pasi ka mundur 2-0 Spanjën. Në St. Etienë, skuadra e trajnerit Antonio Konte, ka mposhtur kampionët në fuqi të Evropës, duke shfaqur në fushë një futboll sulmues. Kështu, në çerekfinale, Italia do të luajë me Gjermaninë.
Pas 90 minutave të luajtura në St. Etienë, Italia ka mundur Spanjën me rezultatin 2-0 dhe kualifikohet në çerekfinale të “Euro 2016”-ës. Një ndeshje guximtare e djemve të trajnerit Antonio Konte që shfrytëzojnë mjaft mirë hapësirat e krijuara nga mbrojtja spanjolle.
Fillimisht është Pelé që rrezikon për herë të parë në portën e De Geas. Më pas, në minutën e 24-t, është Parolo që rrezikon portën spanjolle. Në 33-ën vjen epërsia e Italisë. Eder ekzekuton një goditje dënimi. De Gea në vështirësi nuk e pret si duhet topin dhe Kielini, i ndodhur pranë portierit shënon.
1-0 për të kaltërit e Kontes. Pjesa e parë do të mbyllej me një kundërsulm të Xhakerinit nga krahu i majtë, i cili gjuan fuqishëm, por De Gea grushton. Në pjesën e dytë janë sërish futbollistët italianë që kanë inisiativën. Eder me një aksion personal nga krahu i djathtë i sulmit nuk arrin të shënojë, pasi topi i goditur prej tij grushtohet nga De Gea.
Për Spanjën, është Injesta që krijon rrezikun e parë në portën kundërshtare, me një goditje mjeshtërore, por edhe grushtimi i Bufonit ishte në lartësinë e duhur. Më pas është Piké që provon, por sërish portieri italian është I vëmendshëm. Në të 90-ën minutë Pelé vulos rezultatin në 2-0 për Italinë pas një sulmi të bukur të skuadrës së tij.
Gëzimi i trajnerit Konte është i ligjshëm. Tashmë, në çerekfinale, Italia do të ndeshet me Gjermaninë.
