ASNN – Kombëtarja shqiptare ka humbur ndeshjen e parë në finalet e Evropianit “Francë 2016”, atë ndaj Zvicrës. Ka mjaftuar një gol i realizuar nga qendërmbrojtësi Shar që në fillim të takimit, për t’u dhënë zviceranëve 3 pikët e para në grupin A. Megjithë rastt e krijuara, futbollistët kuqezinj nuk arritën ta ndryshojnë rezultatin. Ndërsa duhet theksuar se Shqipëria e ka mbyllur takimin me 10 lojtarë pas daljes me karton të kuq të Canës.
Debutimi i Shqipërisë në “Euro 2016” nuk ka shkuar ashtu siç do të dëshironin shqiptarët. Në stadiumin e Lensit, të veshur kuqezi, Kombëtarja i ka zhgënjyer të gjithë, jo vetëm me golin e pësuar që në minutën e 5-të, nga Zvicra, por sidomos për ato raste të shpërdoruara, të cilat duhej të çonin në, barazimin madje dhe fitoren e takimit. Një gabim i portierit Etrit Berisha bën që Fabian Shar të shënojë me portën e boshatisur dhe 1-0 për Zvicrën.
Futbollistët kuqezi mundohen të reagojnë dhe, në minutën e 31-të, Shqipëria humbet rastin më të mirë për të barazuar rezultatin, kur Sadiku i vetëm para porte nuk ka mundur të shënojë, pasi portieri Jan Somer ia ka devijuar goditjen. 5 minuta më vonë, skuadra kuqezi merr një goditje tjetër, pasi mbetet me 10 lojtarë. Në një gjest papërgjeshmërie në kufinjtë e sabotimit, duke patur parasysh përvojën e tij, por edhe përmasat epike të kësaj ndeshjeje, kapiteni Lorik Cana merr kartonin e dytë të verdhë dhe njëkohësisht të kuqin.
Duhet theksuar se të dy kartonët e verdhë, në mënyrë të pashpjegueshme, qendërmbrojtësi i Nantës në kampionatin francez, i mori brenda 14 minutash, të parin në mënyrë krejt amatoreske dhe të pakuptimtë. Pas kartonit, ka goditje dënimi për Zvicrën. Godet Xhemajli dhe topi prek shtyllën. Drithërimë në stolin kuqezi, por edhe në shkallët e stadiumit. Në pjesën e dytë, trajneri i Shqipërisë, Xhovani de Biazi mundohet të freskojë skuadrën.
Ai nxjerr nga loja Taulant Xhakën dhe Odise Roshin, duke aktivizuar në vend të tyre, Kaçen dhe Cikalleshin. Në minutën e 75-të, me një lëvizje të bukur brenda zonës, Sadiku provon të godasë nga krahu i djathë i sulmit kuqezi në pozicion të prirët, por topi godet rrjetën e jashtme të portës zvicerane. Në fund të takimit, Shkëlzen Gashi humbet një tjetër rast për të barazuar rezultatin. I vetëm me portierin Somer, ai nuk godet saktë, pasi gardiani i portë helvete e devijon topin jashtë kuadratit.
Ky rast i shkuar dëm ka shuar përfundimisht shpresat për skuadrën kuqezi për të marrë të paktën një pikë nga kjo sfidë. Pas ndeshjeve të para në grupin A, Franca dhe Zvicra ndodhen në krye me nga 3 pikë, ndërsa Rumania dhe Shqipëria kanë 0 pikë. Takimet e radhës në grupin A luhen të mërkurën, më 15 qershor dhe Shqipëria përballet me vendin organizator, Francën, ndërsa Zvicra ndeshet me Rumaninë.