ASNN – Sonte, në orën 21:00 do te luhen dy ndeshjet e fundit te grupit B. Të katër skuadrat janë në loje për të kërkuar kualifikimin. Anglisë i mjafton vetëm një pikë ndaj Sllovakisë ndërsa, ne ndeshjen tjetër, Rusisë i duhet patjetër fitorja përballe Uellsit. Anglia e ka fatin në dorën e saj, por duhet të tregohet e kujdesshme, sepse ndeshja kundër Sllovakisë është e rëndësishme, pasi mund të përcaktojë dhe vendin e parë në grup.
Trajneri i anglezëve, Roi Hoxhson, është nën presion, pasi ka vendosur të mos aktivizojë nga minuta e parë Vardin dhe Starrixhin, dy lojtarë që i dhuruan fitoren Anglisë ndaj Uellsit. “Nuk mendoj se është e rëndësishme që të bëj këto ndryshime në formacion, edhe pse ka shume persona që vijnë dhe më thonë për te ndryshuar, – ka pohuar ai. – Sot do të luajë sërish Harri Kejni dhe jemi të bindur për fitoren.”
Në kampin tjetër, Marek Hamshik, protagonist në fitoren e Sllovakisë ndaj Rusisë është njeriu nga i cili pritet më shumë. Trajneri Jan Kozhak shprehet optimist në marrjen e një rezultati pozitiv. “Mendoj se kemi elementët e duhur për të arritur një rezultat pozitiv ndaj Anglisë, – ka thënë ai. – Nga minuta e parë do të luajë Hamshiku, së bashku me Vladimir Vaisin. Kualifikimin e kemi vetë në dorë.” Kjo ndeshje do të luhet duke nisur nga ora 21:00 dhe do të gjykohet nga spanjolli Karlos Velasko Karbajo.
