ASNN – Në “Stadë dë Nisë” do të luajnë sot në orën 21:00, Anglia dhe Islanda. Dy skuadrat vijnë në këtë sfidë pas vendeve të dyta në grupet përkatëse. Kjo sfidë mbyll tablonë e turin e 16-shes së Kampionatit Evropian. Anglia, e cila në fillim shkëlqeu në atë paraqitje ndaj Rusisë, por që më pas zhgënjeu në dy takimet e tjera, do të përballet sot në orën 21:00 me debutuesit e Islandës, që i surprizuan të gjithë në Kampionatin Evropian.
Vendi i dytë në grup i vendosi “3 Luanët” në zonën e tabelës, ku ndodhën skuadrat me të forta të kësaj veprimtarisë, çka solli dhe kritikat ndaj Roi Hoxhsonit. Në formacionin e anglezëve rikthehet Stërling dhe Smolling, ndërsa në sulm pika e referimit do të jetë Xhejmi Verdi. “Duhet të pranojmë rolin e favoritit në ndeshjen e sotme, – ka thënë trajneri i Anglisë. – Por e dimë që do të jetë një ndeshje e vështirë për ne. Rezultati i ndeshjes do të jetë i rëndësishëm për mua, lojtarët dhe gjithë vendin.”
“Duam të vazhdojmë garën në këtë turne, – ka vijuar ai. – Ndihemi gati por këtë gjë duhet ta tregojmë në fushën e lojës.” Në fakt, Islanda është përralla e këtij Evropiani të futbollit. Pasi i surprizoi të gjithë në grupin F duke mos koleksionuar asnjë humbje, sot në Nisë djemtë e drejtuar nga Lars Lagerbak, do të kenë një sfidë të vështirë ndaj anglezëve. Dhe trajneri suedez i ishullorëve nuk dëshiron të përfundojë këtu rrugëtimi skuadrës së tij.
“Mund të arrijmë fazën tjetër, – ka thënë Lagerbaku. – Për këtë gjë duhet të qarkullojmë topin me shumë se anglezët dhe të shënojmë një gol më shumë se ata. Pjesa më e bukur vjen tani. Nëse arrijmë te fitojmë ndaj anglezëve do të ishte mjaft e rëndësishme për futbollin islandez.” Sfida e sotme do të luhet në orën 21:00 në “Stadë dë Nisë” dhe do të gjykohet nga gjyqtari sllovak, Damir Skomina.
