ASNN – Kampionati Kombëtar i Volejbollit të Meshkujve rinisi me rivalitet të fortë dhe surpriza, sidomos në kryendeshjen e javës së 11-të, ku Erzeni mposhti Vllazninë me rezultatin 3-1. Kjo ishte humbja e parë për shkodranët në këtë edicion, pasi në 9 javët e mëparshme nuk e kishin njohur disfatën. Por përforcimet që ka bërë Erzeni i Shijakut dhe puna përgatitore duket se kanë dhënë efektet e duhura. Ishte një fitore me vlerë, pasi përmbyset kryesimi, ku Vllaznia i lë vendin pikërisht Erzenit.

Rivaliteti në këtë ndeshje ishte shumë i madh, sidomos në 3 setet e para. Kështu, shijakasit fituan setin e parë me shifrat 25-20, kurse shkodranët u kundërpërgjigjën “dhëmbë për dhëmb” në setin e dytë dhe e fituan atë me shifrat 25-22. Dukej se kjo ndeshje do të zgjaste shumë, sepse edhe seti i 3-të ishte i rivalizuar deri në fund dhe pati luftë të fortë sportive. Fituan shijakasit 25-22. Por kur pritej reflektimi i Vllaznisë në setin e katërt, ndodh e kundërta.

Erzeni shpërthen fuqishëm në lojën pranë rrjetës, duke i vënë shkodranët në vështirësi. Këta të fundit dalin nga detyrat e tyre taktike dhe e kanë të pamundur të frenojnë sulmin mjaft efikas të Erzenit. Për pasojë, ekipi shijakas e fiton këtë set me shifrat 25-13 dhe krejt ndeshjen me rezultatin 3-1, duke marrë kryesimin e renditjes me 28 pikë dhe duke lënë në vend të dytë Vllazninë, e cila mbetet në kuotën e 25 pikëve. Ndërkohë, në ndeshjet e tjera të kësaj jave, spikati dueli mjaft i rivalizuar që u zhvillua në Korçë.

Ai midis Skënderbeut dhe Tiranës, duel i fituar nga kryeqytetasit 3-2. Dy herë kaloi në epërsi me sete Skënderbeu, por nuk ia doli, pasi Tirana u përkushtua në fushë dhe në setin final fitoi 15-11 dhe krejt ndeshjen 3-2. Një fitore me vlera për bardheblutë që jo vetëm e ruajnë vendin e 3-të, por shkëputen me 4 pikë ndaj Skënderbeut që mbetet në vend të katërt (23-19 me pikë). Studenti (i penalizuar dhe i falur më pas nga Federata) arriti të fitojë 3-1 ndaj Elbasanit, por hasi në mjaft vështirësi.

Sidoqoftë, kjo fitore e ruan për momentin nga kërcënimi që i vjen nga poshtë në renditje prej skuadrës së Farka Volejit. Pikërisht kjo e fundit fitoi 3-0 ndaj Teutës, duke marrë pikë të çmuara për renditjen, sepse e zhyt dhe më tej skuadrën durrsake në renditje, por në të njëjtën kohë lë prapa në vend të parafundit skuadrën e Elbasanit. Pra ambiciet e Farka Volejit janë të mos bjerë nga kategoria.

Kampionati Kombëtar

i Volejbollit – Meshkuj

Java e 11-të

Të shtunën, 9 shkurt 2019:

Skënderbeu – Tirana           2-3

(25-22, 19-25, 25-20, 22-25, 11-15)

Studenti – Elbasani              3-1

(25-27, 25-21, 25-21, 25-18)

Farka Volej – Teuta              3-0

(25-21, 25-18, 25-19)

Erzeni – Vllaznia                  3-1

(25-20, 22-25, 25-22, 25-13)

Renditja

Nr.       Skuadra         N.        F.         H.        Setet               Pikë

1. Erzeni                        10        9          1          29-6                28
2. Vllaznia         10        9          1          28-10              25
3. Tirana             10        8          2          26-13              23
4. Skënderbeu  10        6          4          23-16              19
5. Partizani        10        4          6          17-15              13
6. Studenti         10        4          6          14-21              12
7. Farka Volej    10        3          7          13-23                8
8. Elbasani        10        1          9            7-27                4
9. Teuta                9        0          9            0-27                0