ASNN – Niveli i dytë i Kampionatit Kombëtar të Futbollit, që njihet si Kategoria e Parë, ka luajtur të dielën dy ndeshjet e fundit të javës së 14-të në Grupin A, apo grupin e Veriut. Kështu, Erzeni ka vazhduar edhe në këtë javë me serinë e rezultateve pozitive, duke marrë një fitore 3-0 në fushë të huaj me Partizanin B.
Të kuqtë kanë luajtur me një lojtar më pak që nga minuta e 28-të pasi Franci Lala është ndëshkuar me karton të kuq. Seria e golave në ndeshjen që u soll për sportdashësit drejtpërdrejt nga Rrjeti i Radio-Televizionit Shqiptar, në kanalin RTSH Sport, është hapur në minutën e 42-të teksa Karaj ka shënuar nga pika e bardhë e 11-metërshit.
Në pjesën e dytë, pikërisht në minutën e 76-të, Troplini ka dyfishuar shifrat, ndërsa Hima në minutën e 84-t ka mbyllur të gjitha llogaritë duke sigluar rezultatin 3-0 të skuadrës shijakase. Fitore ka korrur të dielën edhe Korabi, që ka mposhtur Besëlidhjen në fushën e kësaj të fundit, me rezultatin 1-0.
Goli i vetëm i kësaj sfide është shënuar në minutën e 89-të me autor Markun, i cili i ka dhuruar 3 pikë mjaft të vlefshme skuadrës dibrane. Nga ana tjetër, Besëlidhja ka konfirmuar edhe njëherë periudhën jo të mirë që po kalon, duke marrë një tjetër goditje në shpresat e saj për ngjitje.
KATEGORIA E PARË
GRUPI A
Java e 14-të
Të dielën, 7 mars 2021:
Partizani B – Erzeni 0-3
Shënues: Karaj 42’(11-m.), Troplini 76’, Hima 84’
Besëlidhja – Korabi 0-1
Shënues: Marku 89′
Renditja
Nr. Skuadrat Nd. F B H Gsh-Gp Pikë
- Burreli 12 8 4 0 23-7 28
- Dinamo 12 8 2 2 15-4 26
- Korabi 13 7 3 3 14-8 24
- Erzeni Shijak 13 5 3 5 15-11 18
- Vora 13 4 2 7 6-16 14
- Besëlidhja 12 3 4 5 12-12 13
- Oriku 12 3 2 7 4-11 11
- Partizani B 12 2 4 6 11-20 10
- Veleçiku 13 2 4 7 9-20 10
