ASNN – Vetëm 0-0 në Shijak, në takimin e sjellë për sportdashësit drejtpërdrejt në RTSH Sport. Erzeni-Kastrioti ka qenë takimi më i spikatur i javës së 16-të të grupit A të Kategorisë së Parë, që u zhvillua të shtunën.  Kjo përballje, që u soll për sportdashësit drejtpërdrejt nga Rrjeti i Radio-Televizionit Shqiptar, në kanalin RTSH Sport, u mbyll me rrjeta të paprekura. Kjo ndeshje ka vënë përballë vendasit, që mbanin deri para ndeshjes vendin e 5-të, me 21 pikë, me krutanët që kryesonin renditjen me 12 pikë më tepër.

Pjesa e parë e ndeshjes ka folur më tepër për skuadrën vendase, e cila praktikisht e ka zhvendosur lojën në gjysmëfushën e krutanëve, të cilët, nga ana tjetër, janë mjaftuar me përballimin e trysnisë së kundërshtarëve dhe me shfrytëzimin e kundërsulmeve apo goditjeve të lira apo atyre të këndit për ta kërkuar golin. Përtej rasteve që nuk kanë munguar për të dyja skuadrat, natyrisht, më tepër të Erzenit, 45 minutat e para janë mbyllur me rrjeta të paprekura. Pjesa e dytë ka patur një tjetër tablo, me të dyja skuadrat që luajnë më hapur në kërkim të golit që do të ndryshonte shumëçka.

Megjithatë, qoftë nga lufta e ngjeshur që në mesfushë, qoftë nga ngutja para portës apo edhe nga mbrojtjet dhe portierët përkatës që kanë ruajtur përgjithësisht përqendrimin, asnjëra nga skuadrat nuk ka arritur ta thyejnë dot njëra-tjetrën. Edhe pse Kastrioti e ka mbyllur ndeshjen me 10 lojtarë, Erzeni nuk ka mundur të përfitojë nga epërsia numerike dhe, kësisoj, kjo përballje është mbyllur me rrjeta të paprekura. Kastrioti thellon epërsinë në krye të renditjes, me 34 pikë, ndërsa Erzeni mbetet në vendin e 5-të, me 22 pikë.

Në takimet e tjera të luajtura të shtunën, Dinamo ka shtangur në kryeqytet Besëlidhjen, duke e mundur 2-0, Korabi ka fituar me një gol të vetëm në shtëpi ndaj Egnatias, ndërsa Burreli dhe Veleçiku kanë shënuar nga një gol e kanë ndarë nga një pikë secila. Për efekt kalendari, Tërbuni ishte pushim.

Kategoria e Parë

Java e 16-të:

Grupi A

Të shtunën, 22/02/2020:

Erzeni – Kastrioti                               0-0

Dinamo – Besëlidhja                                    2-0

Burreli – Veleçiku                             1-1

Korabi – Egnatia                               1-0

Tërbuni                                              pushim