ASNN – Kampionati Kombëtar i Volejbollit për meshkuj po shkon drejt fundit, por Erzeni dhe Vllaznia edhe teorikisht dhe praktikisht e kanë siguruar gjysmëfinalen. Natyrisht, faza “play-off” në volejboll është e ndryshme nga ajo e basketbollit, pasi në volejboll ka më shumë pjesëmarrje. Për këtë arsye, si dy skuadrat e vendeve të para në renditje, Erzeni dhe Vllaznia shkojnë direkt në gjysmëfinale dhe presin dy gjysmëfinalistet e tjera që do të dalin nga pozicionet midis vendit të 3-të dhe vendit të 6-të.

Shijakasit korrën të shtunën një fitore të radhës, duke mundur Studentin me rezultatin 3-1 dhe duke konsoliduar pozitat e tij në vendin e parë. Vllaznia që ndodhet në vend të dytë mposhti me të njëjtin rezultat 3-1 Farka Volejin. Fitore me vlerë arriti të shtunën edhe Partizani i trajnerit Ylli Tomori, që mundi Skënderbeun me rezultatin e thellë 3-0. Kujtojmë që ndeshja e katërt e kësaj jave është luajtur të premten, ku Teuta fitoi ndaj Elbasanit në fushën e këtij të fundit, me rezultatin 3-2.

Duke qenë një surprizë jo e vogël, pasi dihet që durrsakët janë në vend të fundit dhe të pashpresë. Pas kësaj jave mund të evidentohet një fakt interesant, që Erzeni dhe Vllaznia bëjnë diferencë me ekipet e tjera, por në garë dhe me pretendime janë edhe dy skuadrat e forta kryeqytetase, si Tirana dhe Partizani. Njëlloj si në basketbollin e meshkujve, ku qendra e rëndesës është spostuar jashtë kryeqytetit, e pikërisht në Durrës (konkurrojnë Goga Basket me Teutën), edhe në volejbollin e meshkujve shanset më të mëdha për titull i kanë ekipet jashtë Tiranës, në Shijak dhe në Shkodër.

Kampionati Kombëtar

i Volejbollit – Meshkuj

Java e 17-të:

Të premten, 29 mars 2019:

Elbasani – Teuta                   2-3

(25-14, 25-14, 18-25, 13-25, 4-15)

Të shtunën, 30 mars 2019:

Vllaznia – Farka Volej          3-1

(21-25, 25-20, 25-9, 25-7)

Partizani – Skënderbeu       3-0

(25-21, 25-16, 25-23)

Erzeni – Studenti                  3-1

(25-17, 25-15, 22-25, 25-18)

Tirana                                     Pushim

Renditja

Nr.       Skuadra         N.        F.         H.        Sete                Pikë

1. Erzeni                        16        15          1        47-9                45
2. Vllaznia         15        14          1        43-14              39
3. Tirana             15        11         4        39-21              34
4. Partizani        15          8          7        30-22              25
5. Skënderbeu  15          8          7        29-25              25
6. Studenti         15          7          8        24-28              21
7. Farka Volej    15          3        12        15-38                8
8. Elbasani        15          1        14        11-41                5
9. Teuta              15          1        14          3-44                2