ASNN – Erzeni ka fituar sot 1-0 me Besën, ndeshje kjo e vlefshme për javën e 7-të të Kategorisë së Parë. Ka mjaftuar për gol i realizuar nga Basha me 11-metërsh, që skuadra shijakase të marrë 3 pikët e plota. Pas kësaj fitoreje, Erzeni ngjitet në kuotën e 10 pikëve.

Takimi i parë i javës së 7-të të Kategorisë së Parë, i vlefshëm për grupin A, ai midis Erzenit dhe Besës është përcjellë për të gjithë teleshikuesit nga Rrjeti i Radio-Televizionit Shqiptar. Një sfidë e rëndësishme kjo, e cila u fitua nga skuadra shijakase me rezultatin 1-0.

Pjesa e parë nis vrullshëm për Erzenin që ka më shumë inisiativë për të shënuar. Por në minutën e 32-të, është Besa që rrezikon. Vetëm ndërhyrja në vijën fatale të portës, e qendërmbrojtësit Teqja, shpëton Erzenin nga pësimi i golit, pasi portieri Hoxha ishte larguar nga porta.

Dy minuta më vonë, kundërpërgjigjet Erzeni, teksa Lleshi nuk arrin ta dërgojë në rrjetë një top brenda në zonë. Me shumë pak raste të krijuara dhe me rezultatin 0-0 mbyllen 45 minuta e para. Edhe në fillim të pjesës së dytë, Erzeni krijon rastin e parë me anë Kalarit, në minutën e 54-ët.

Por topi kalon mbi kuadratin e portës së Besës. Një minutë më vonë, Erzeni sërish rrezikon me anë të Kallucit, me një goditje ballore që gjithashtu përfundon jashtë. Në të 59-ën, 21-vjeçari Troplini nuk arrin ta çojë topin në rrjetë, kur ishte i vetëm brenda zonës së Besës. Është minuta e 65-të që vulos fatin e takimit.

Kamara prek topin me dorë në përpjekje për ta nxjerrë jashtë zone. Gjyqtari Breshanaj jep 11-metërsh për Erzenin. Protesta të lojtarëve të Besës por vendimi i gjyqtarit nuk ndryshon. Nga pika e bardhë realizon Basha dhe 1-0 për Erzenin. Pas kësaj fitoreje, skuadra shijakase ngjitet në kuotën e 10 pikëve në grupin A.