ASNN – Të shtunën nisi edhe faza e dytë e Kampionatit Kombëtar të Volejbollit për Meshkuj, që korrespondon me javën e 10-të të garës. Padyshim, kryendeshja e kësaj jave ishte ajo mes Erzenit dhe Partizanit, që u fitua nga skuadra shijakase 3-1, duke bërë që Erzeni të marrë i vetëm kryesimin e kampionatit. Një 3-pikësh për shijakasit që do të thotë shumë për nisjen e këtij viti, por njëherësh dhe në rivalitetin me Vllazninë.

Kjo e fundit nuk e luajti ndeshjen e saj, pasi Studenti rival nuk u paraqit në ndeshje. Shkak është vendimi që ka marrë Federata Shqiptare e Volejbollit, e cila e ka pezulluar pa afat për mungesën e shlyerjes së detyrimeve financiare. Sa i takon ndeshjes Elbasani-Skënderbeu, ajo nuk pati asnjë histori dhe u fitua thellë nga skuadra korçare me rezultatin 3-0.

Ky trepikësh konsolidon fort pozitat e Skënderbeut në renditje, duke rritur kështu pretendimet për një pozicionim më të mirë. Një fitore me vlera korri edhe Tirana, e cila mundi 3-1 Farka Volejin. Kjo fitore e rëndësishme e mban Tiranën në vend të 3-të në renditje, një pozicion i mirë për objektivat përfundimtare të bardhebluve. Kurse Farka Volej është skuadër që ka në përbërje shumë të rinj dhe shihet si ekip i perspektivës.

Në lidhje me ndeshjen e pazhvilluar midis Vllaznisë dhe Studentit, FSHV ende nuk ka marrë një vendim se kur do të luhet, pasi prej reflektimin e Studentit, pra që të shlyejë detyrimet, në të kundërt do të mbetet në fuqi vendimi që Vllaznisë t’i jepet fitorja në tavolinë.

Kampionati Kombëtar

i Volejbollit – Meshkuj

Java e 10-të

2 shkurt 2019

Elbasani – Skënderbeu       0-3

(16-25, 18-25, 22-25)

Tirana – Farka Volej             3-1

(25-22, 20-25, 25-13, 25-20)

Partizani – Erzeni                 1-3

(22-25, 25-21, 20-25, 16-25)

Vllaznia – Studenti               3-0

(25-0, 25-0, 25-0)

(Nuk u zhvillua, Vllaznia fiton në “tavolinë”)

Teuta                                      (pushim)

Renditja

Nr.       Skuadra         N.        F.         H.        Pikë

1. Erzeni            9          8          1          25
2. Vllaznia         8          8          0          22
3. Tirana             9          7          2          22
4. Skënderbeu 9          6          3          18
5. Partizani        9          4          5          13
6. Studenti         8          3          5            9
7. Farka Volej    9          2          7            5
8. Elbasani        9          1          8            4
9. Teuta             8          0          8            0

Shënim: Studenti është pezulluar pa afat nga FSHV-ja

dhe nuk e luajti ndeshjen e së shtunës me Vllazninë.