ASNN – Tek Elbasani nuk mbarojnë afrimet. I fundit që i është bashkuar grupit është mesfushori Emiljano Shehaj, që me shumë gjasa do të vijojë aventurën tek Elbasani. Mesfushori luajti edhe sezonin e kaluar me elbasanasit, ku nuk munguan problemet financiare, ndaj me mbarimin e kampionatit vendosi të largohej.

Por mesa duket “dashuria” për verdheblutë nuk ka përfunduar dhe ditën e djeshme ka dalë në stërvitje me pjesën tjetër të skuadrës. Sipas të gjitha gjasave do të qëndrojë edhe këtë sezon me elbasanasit dhe mund të quhet një “blerje” në këtë merkato duke parë se si shkuan gjërat.

Nga ana tjetër, dje kanë firmosur zyrtarisht me ekipin edhe mesfushori Enkel Alikaj dhe sulmuesi Mustafa Agastra, duke e kompletuar në këtë mënyrë skuadrën. Verdheblutë janë treguar shumë aktivë këtë merkato vere dhe duket sikur ardhja e pronarëve të rinj ka zgjuar elbasanasit.

Kjo pasi duket se ata po bëjnë investime për të pasur një skuadër pretendente për t’u ngjitur në Kategorinë Superiore. Ky do të jetë viti i dytë radhazi që elbasanasit militojnë në Kategorinë e Parë të Kampionatit Kombëtar të Futbollit dhe një tjetër dështim do të ishte i tepërt për këtë qytet.